夏天殺到，買左雪條未？

冰涼透心的雪條

天氣開始熱，放工返到屋企，行到人又「立痴痴」又成身汗，呢個時候，最好就係食條雪條降下溫。

巨星雪條，記唔記得？

細個o既時候最鐘意食既係嘉頓既「巨星雪條」，即係上面係七彩碎糖，中間係雲呢嗱味雪糕，下面係西瓜味雪條味果隻。小學果陣係個半一條，好好味架，不過聽聞依家已經停產。其實嘉頓慶祝乜乜周年既時候大可以考慮下出番呢d懷舊野，我仲記得有穿梭機雪條同蓮花杯，一定會大受歡迎。

另一樣成日食既係「冰條」，當時好似只係5毫子條，一條可以分成兩份。我記得冰條有好幾種顏色，紅、黃、綠、橙，其實味道差唔多，但果時覺得好好味，又平。明明全部色都一樣味，但細個都死要爭顏色，仲死要覺得係唔同味，好無聊，不過係細個至可以afford到呢d無聊。:D

巨星雪條包裝

穿梭機雪條

好多懷舊雪條都已經停產，依家仲有得賣既，得番鳳仙、脆皮樂，記得呢兩種雪條係特別貴，媽咪唔係次次都肯買比我食，所以我食得最多既係紅豆樂、古力樂、檸檬冰冰同橙冰冰。

以前食鳳仙會刻意食得好慢，因為唔捨得食晒佢。我會分一層層咁食，首先食晒成層香蕉味既脆皮，再食呍呢嗱雪糕，最後就食菠蘿味雪條。記得以前為左食鳳仙，真係會同家姐爭，爭輸左會喊又會嬲阿媽。依家大個有錢買，就唔會再好似以前咁珍而重之，大啖大啖咁食。唔知係咩原因，我真係覺得鳳仙冇以前咁好食。

 鳳仙 ^^

近年已經食少左好多雪條，亦都唔知有咩新野。幾年前去韓國食過一隻叫MELONA既蜜瓜味雪條，好CREAMY既蜜瓜味，好好食，依家連香港都有得賣 (部分OK揾到)。最近佢仲出左香蕉味，見到既話記住試。

上星期睇雜誌見到雀巢出左雙層鮮果牛奶捧，係蜜瓜加芒果味既組合，即刻去左OK買來試，$9兩
條又唔係貴喎。

夏天殺到嚟，係時候買定D雪條放o係屋企個雪櫃。唔理你係開行冷氣o係屋企煲劇，還是游完水跑完步行完街返屋企，打開冰箱，迎接果陣涼涼既冷風，同埋一支支等住你食既雪條，有咩比呢一刻更令人滿足？