平民自助餐

上水有條食街，不定時於晚上十點半左右出現，住新界北嘅相信都見過或者略有所聞。要去呢條街要睇運氣，時運高就會見到，時運低就下次請早。點解咁講？因為呢條係非法流動小販街。食環捉得勁果排，風聲緊，啲檔口仔就要稍為避下，有時開開下檔賣賣下嘢，都可能忽然走鬼，錢都唔收你，十秒內就閃左。

呢條食街，我哋私下稱佢為「平民自助餐」，位於上水港鐵站大堂通向彩園邨嘅天橋。粗略估計，呢條天橋全長大約150米。街坊們夜晚搭火車返到上水，又或者想話揾啲嘢食下，呢度絕對係不二之選。

延綿100米的美食天堂

見過呢條街嘅街坊都知，呢度嘅場面真係好壯觀，可以講話係令人嘆為觀止！延綿100米分左右兩邊一字排開，至少有二、三十檔小販，每一檔賣嘅嘢都唔同，絕無重複，真係好犀利。無論係西裝友、花枝招展嘅正妹、踢住拖嘅街坊、恩愛嘅夫婦/情侶、拖住細路嘅家庭，大家不分背景，一齊掃街，場面都幾墟冚。

右手邊第一檔，一定係魚蛋魷魚檔。睇檔嘅通常係一個阿姐，或者係日頭喺同一個地方賣砵仔糕嘅阿哥。跟住係臘味飯、蒸燒賣/粉果/牛肉球、雞蛋仔、串燒、煎釀三寶、生滾粥、剪剪下腸粉、鹽焗鵪鶉蛋/鴨腎/雞翼、滷水雞翼/雞蛋/鴨翅、碗仔翅魚肉、炸大腸、珍珠奶茶、五花茶/雪梨茶**、布拉腸粉、各式糖水、台式可麗餅、鐵板炒(金姑、牛肉、肉片...)公仔麵/油麵/幼麵/河粉/炒菜/XO醬炒腸粉**、油渣麵、鐵板雞軟骨/蒜香牛肉粒**、銀針粉/粉仔**、章魚小丸子、豆腐花、合桃糊(一味)、潮式粉麵(墨丸河、魚蛋河)**、馬豆糕/大菜糕/紅豆糕、西式PANCAKE、壽司手捲 ......種類太多不能盡錄。鐘意食乜就食乜，廿蚊已經足夠填飽個肚。(**長龍檔口)

呢度係平民嘅天堂，只要你有一架木頭車，或者有一份創意，就可以發揮所長，發達就唔駛諗，但應該可以搵番餐晏仔食下。檔主們日頭做咩，我都唔知，不過每晚10點半左右，就會推著木頭車出現，街坊見時候差唔多，就會來碰碰運氣。就好似功夫嘅「豬農城寨」，臥虎藏龍，個個「身懷絕技」。

地下秩序

廿幾三十檔流動小販，無一重複，而且每一檔都有固定位置，唔會忽然搬左去街尾，性質相近嘅一定唔會擺隔離，就連走鬼都有既定嘅「快閃逃生路線」，呢一種「地下秩序」大家都知係咩原因。

記憶中，類似咁嘅規模嘅食街，只係得以前大埔墟公園仔。細個有段時間，幾乎個個星期都去姨媽屋企玩，樓下就係呢條食街。大人打麻雀，我地成班細路，一到下晝3、4點就會落去掃街。我最記得嘅係碗仔翅同雞蛋仔，印象中佢地係全世界最好食嘅，長大左食其他果啲，都無人能及。後來，呢啲檔口逐漸消失，各自散落喺唔同地方，大本營瓦解。有啲上左舖，好似豆腐花、車仔麵就喺公園仔附近嘅地舖營業至今。雞蛋仔叔叔曾經喺大埔中心一帶出現過，後來銷聲匿跡。

平民食街俾我嘅感覺似台灣夜市，唯一唔同嘅係，台灣夜市係規管化嘅(當然我亦見過非法小販走鬼，但至少佢有發牌制度，有途徑有空間同有場地俾小販去做)。香港都有少數持牌小販，不過係賣生果同糖蔥餅糯米糍等不會生火嘅食物，而且數目少之又少。

小販走鬼，我細個見得多。推住架車，搏命狂奔，同時又要避開途人，場面都幾驚險。一旦被捉，成架車充公，乜都化為烏有 (我細個覺得拉人果啲叔叔就好啦，可以成檔魚蛋燒賣碗仔翅拉番去自己慢慢篤嚟食)。曾經見過上左年齡嘅阿姐被人捉左，苦苦哀求，當然係冇用啦。走得甩嘅，稍為避下。半個鐘之後，又成行成市了。街坊都見慣，等一陣會再嚟買，或者再嚟俾番錢 / 找番錢。

社會進步，香港人對於環境衛生、市容等要求愈來愈高，我覺得無可厚非。非法流動小販係非法嘅，政府亦唯有依法辦事，見到就拉。

不過，觀乎呢啲小販嘅受歡迎程度，佢地又係咪毫無存在價值呢？咁受歡迎，又為乜「淪落」至此？開檔都要心慌慌，時時刻刻準備走鬼？

小販政策


關於小販，政府係咁講嘅：

""街頭販賣在香港有悠久歷史。街頭販賣為不少基層人士提供就業機會，普羅市民亦可買到較廉價的物品。然而，街頭販賣會引致環境衞生、噪音及阻塞公眾通道等問題，對附近居民和行人帶來滋擾。此外，亦有租用處所經營的商戶投訴街頭販賣對他們的經營構成妨礙。過去三年，食環署平均每年均接到 約11 200宗有關持牌小販和非法 街頭擺賣的投訴。

當局多年來的政策，是妥善規管持牌小販的販賣活動，並就非法擺賣採取執法行動。鑑於街頭販賣引致的各種問題，前巿政局自1970年代初起，在一般情況下已不再簽發新的小販牌照，而已簽發的各類小販牌照的繼承和轉讓亦有嚴格限制，流動小販牌照更被禁止轉讓和繼承，目的是藉自然淘汰逐步減少小販數目。當局亦曾透過遷置小販到公眾街市，以期進一步減少小販數目，並改善街道環境衞生。持牌小販的數目(包括各類固定攤位小販和流動小販)已由1980年代末的20 000名減至目前約7 000名。

小販的種類和數目(截至 2011 年 12 月 31 日)  (資料來源：食環署)


沒有特別安排「朝行晚拆」的街上固定攤位 ： 約 3 400  
「朝行晚拆」型的街上固定攤位：約 1 100   
擦鞋：5    
熟食或小食 233   
報紙 533 (加2個流動) 
工匠 194  
理髮 40    
靠牆攤檔 332  
冰凍甜點   77個流動 
流動車 16個流動 
小販市場內固定攤位：609  
其他類別 (例如冬天小食（炒栗子等）流動小販)： 410


共 6 480 個固定及505個流動小販 


相比以往，小販的數目已大幅減少。近年，社會有意見認為小販行業富有傳統特色，一些小販區更是著名的旅遊點，吸引不少遊客，因此應予保留及活化。同時，亦有意見認為，小販行業發揮着重要的社會功能，既是普羅市民購買日常用品和食物的重要途徑之一，又為社會基層提供就業機會和生計。"

對於小販，政策係唔鼓勵，由佢地自然淘汰。

有人話，係地產發展令小販無處容身。呢個係當然嘅。我投資咁多錢整靚個屋苑同埋周圍嘅環境，但小販就令到環境污糟又嘈雜，甚至會構成危險，令成個屋苑檔次都低晒，樓價都影響埋；商場整到咁靚，開大冷氣，應有盡有，就係想市民集中喺一個地方消費，小販咁平我啲舖邊個租？對於租個舖嘅商戶來講，俾左幾萬銀去租，外面小販租又平甚至唔駛錢，我仲駛做生意咩？所以，從地產商嘅角度，小販絕對唔應該蓬勃發展。就算俾佢生存，都要行遠啲，唔可以接近我屋苑或者商場。

香港咁細，度度都話唔好接近我，咁小販仲可以去邊呢？有牌嘅固定小販，可以繼續做到死果刻，如果你啲子子孫孫都仲想做，可以留俾下一代；有牌嘅流動小販，唔好意思，你死左就掰掰；俾得起租嘅，可能入左公屋商場或者其他地舖，但領匯接手公屋後，仲有幾多可以生存到，我就無數據。現時，有牌嘅流動熟食或小食小販經已唔存在，政府亦唔會再發牌。所以，如果你想賣下小食，做下小本生意，除非你好命，祖宗剩低個舖俾你，或者你投資有道，或者你好彩租到平舖，又或者你投到個街市熟食檔口(但如果你唔係以往果啲安置戶可以享有特惠價幾千蚊月租，就要加入投標，唔係講笑，大埔街市幾年前投標，一間約一百呎嘅舖(包樓面同廚房)，前面4-5張枱，月租可以去到5萬。)

咁，你可以去邊呢？

相比起舖租分分鐘過萬，如果捉一次罰幾百，一個月唔好彩捉10次都係幾千，計落仲划算，ONE MAN BAND，客人GRAB & GO唔駛招呼，仲唔駛打理間舖，唔驚被迫走被加租，呢啲會唔會係市民寧願被人拉，都要做非法流動小販嘅原因？

近年愈來愈多市民認為小販係街頭特色文化，希望予以保留，甚至加以發揚光大，搞啲類似市集 / 大笪地嘅地方，或者學下台灣搞啲觀光夜市，又或者學下外國搞下市集，將小販進一步納入規管之餘，又可以保存呢啲民間嘅傳統，同時令低下階層有更多就業機會。

另一邊廂，亦有唔少市民覺得小販好擾民，因為佢地搞到地方立立亂，又成日違規擺到周圍係，遇有火警仲死，好容易就搞出人命。就連台灣呢個夜市咁盛行嘅地方，都尚且有師大夜市事件(師大夜市商圈因近年愈來愈旺，商戶對附近居民構成噪音、環境、治安等多方面問題)，引發民與民之間嘅衝突同矛盾。我覺得，小販衍生嘅問題又確實係唔可以忽視。

民主社會，邊個嘅意見先應該採納？支持同反對嘅意見，又係唔係ALL OR NOTHING，百分百對立？有冇一啲雙贏嘅辦法呢？

小小愚見，幾年前去台南旅遊，發覺果度嘅夜市好多係流動夜市。流動夜市同一般大家行開嘅商圈夜市(好似師大夜市)或者觀光夜市(饒河街、士林、華西街、通化街、羅東、逢甲觀光夜市，同時類似香港嘅女人街、廟街觀光區)唔同，唔係日日開，而係多個不同夜市每星期不同日子輪流開。好似最有名嘅花園夜市，平日係一個停車場(同維園花市差唔多咁大)，但每逢星期四、六、日下晝五點開始，小攤檔就會陸陸續續嚟開檔，到零晨時分陸續收檔。其他日子就可以去其他夜市，例如小北、武聖等等。部分小販會喺唔同地方擺檔，有啲就只此一家。

流動夜市一般係喺一啲大型空地上營運，例如停車場、運動場等等，位置一般唔近市區，反而比較新住宅區或者郊區。政府嘅角色包括係出租土地，或者協助規管等等。同時，流動夜市亦好需要小販自律，收工後要清好晒所有嘢先交場。

有啲夜市如花蓮的自強夜市，因原本喺舊火車站六期重劃區做生意嘅小販，基於政府收地而無法繼續營業，其後由目前夜市嘅股東找到現址私人土地，再招攬小吃小販在此營業。

同樣都係地嘅問題。香港要做到呢一點可能比較難，因為當中涉及土地用途、消防條例等好多法律問題，冇政府支持唔會成事。

假如流動小販揾到幾個集中地(例如係長期空置嘅公地或者私人土地)，以流動方式營業，可以解決到負擔唔起商場、舖頭租金嘅問題，同時「流動式經營」唔會對附近商戶構成長遠威脅，小販亦肯去合作接受一啲安全性、環境性嘅規管，減少對附近人口造成嘅滋擾。咁會唔會係一條出路呢？

劉青雲

劉青雲又再一次失望而回。

學黃秋生話齋，香港電影金像獎擺明就係小圈子選舉，呢一點本身都唔係有問題嘅。只不過當民意好overwhelming地認為劉青雲應該攞獎，而佢又攞唔到嘅時候，就覺得寧舍失望咁啫。

個人認為，劉華得獎係評審想鼓勵同肯定佢嘅貢獻多於佢喺《桃姐》嘅表現。無可否認，劉華確實係好有心，咁多年嚟，蝕到入肉都肯去投資電影，資助好劇本拍攝成電影，扶植好多新晉導演同演員。《桃姐》揚威海外，橫掃好多獎項，無疑係吐氣揚眉，我都好替劉華高興(唔講唔知我小學嘅時候都係劉華粉絲)。基本上，有威尼斯影展、金馬獎等佳績在前，《桃姐》本身已經係大大大熱，Ann Hui 同 Deanie姐本身亦係冇得輸，絕對係實至名歸。最佳電影、最佳編劇亦都好穩陣，咁嘅背景之下，《桃姐》效應確實係無可避免。

香港電影沉寂左好幾年，近兩年又話台灣電影走出陰霾，愈來愈有質素，叫好叫座，由《海角七號》開始，台灣人開始走番入戲院，到後來嘅《艋舺》、《翻滾吧阿信》，到《那些年》成為港台神話，之後嘅《賽德克巴萊》，以致近期嘅《LOVE》，大家都話台灣電影又有希望喇。相比之下，香港電影確實係失色一啲。我地需要多幾個像許鞍華彭浩翔咁入屋咁local的導演，需要多幾個劉華咁嘅投資者(去幫佢揾內地老闆加碼)，去拍多啲關於香港嘅戲。

有時judgement呢啲野係一線之差，一個演技好、俾個獎絕對係符合大眾願望，但套戲本身聲威唔高，就算得到最佳男主角對電影業impact都唔大；另一邊廂，《桃姐》聲名大噪，又係好「香港」嘅電影，如果一氣過攞晒最佳電影、最佳導演、最佳編劇、最佳女主角，獨欠最佳男主角，感覺上就唔夠完美。以劉華嘅演技，做任何戲都可以不過不失，′《桃姐》你話佢做得好咩又稱唔上，做得唔好咩又唔係，以佢今時今日嘅地位，你俾個獎佢，唔會有人有好大嘅反對，但就可以為《桃姐》喺金像獎嘅歷史上寫下完美嘅一頁。所以，劉華個獎係咁嚟嘅。

雖則劉青雲成日話唔介意得唔得獎，之但係，作為佢嘅支持者，又確實好戥佢唔抵。

睇番金像獎歷史(資料來源：維基百科)，原來劉青雲由一九九四年第13屆金像獎憑《新不了情》同《七月十四》獲兩個提名入圍最佳男主角開始，到今屆第31屆已經被提名過12次。

相比入圍最多嘅發哥(14次)，只差兩次，但發哥獲獎三次，劉青雲只得一次。

最灰嘅係，經過噚晚，劉青雲(入圍12次，得一次)仲打破埋「入圍最多但得獎次數最少」嘅成龍紀錄(10次，冇一次得)。一諗到佢竟然打破成龍紀錄就覺得好灰。金像獎呀金像獎，可唔可以快啲俾番個獎佢，等佢唔駛包成龍尾呀？

講開劉青雲，我發現其實好多香港女人(港女？)都好鐘意佢，包括我在內。近年成日都有人批評港女要求高，揀老公要似金城武吳彥祖古天樂(但自己又唔係Lisa S同李嘉欣)，其實我覺得佢地唔係好了解女人。就以我呢個成日勁讚金城武吳彥祖(古天樂我唔鐘意)嘅女人為例，我或者見到金城武同吳彥祖會嘩嘩聲，又或者某日喺街度見到個靚仔會開心成日，但係認真咁講，劉青雲同金城武、劉青雲同吳彥祖、劉青雲同木村拓哉，我都係會揀劉青雲。不過，可能跟住又有人講，又唔知自己唔係郭藹明(郭藹明實在係最有眼光嘅「港女」之一)!!!!我唔理，我淨係知Brenda都搵到個黃曉明啫~~ :P

做人不可太自大

又嚟。年幾兩年前上水有區議員「成功爭取」木棉花絮飄落之前將木棉花剪晒，以保護果d本身有敏感症嘅市民，今日新聞報導粉嶺又有人投訴木棉花絮擾民。

到底呢個係咩世界？點解依家人嘅價值觀會扭曲成咁？你只係世界嘅一部份，唔係世界嘅全部。你嘅存在係要學習點樣同其他人或者其他事物共存，而唔係因為人地對你構成不便，你就要趕絕人地，連生路都唔俾人行。

果d覺得木棉花好靚，唔介意佢年年開花，但係又唔想佢開完花d花絮會周圍飄，於是叫人將人地d花剪晒落嚟嘅人，其實就等於貪人幾靚就當人地係花瓶，年年搞大人個肚之後，年年叫人去落仔一樣。

至於果d覺得木棉花絮令敏感症或者哮喘加劇，所以直情要斬晒d木棉花樹嘅人，就等同覺得任何人如果有傷風感冒等傳染病，仲有可能傳染埋比佢，就要立即判處死刑一樣。呢個比喻其實唔夠貼切，對木棉花都唔公平，因為木棉花根本連傷風感冒都冇。先搞清楚點解你會有敏感症或者哮喘？唔係因為木棉花絮天生係致敏源，亦唔係因為木棉花存在而導致你有哮喘，而係因為你自己身體弱、免疫能力弱，所以木棉花絮先至會成為你嘅致敏源或者引發哮喘。問題係出於你本身，而唔係木棉花。所以，其實你最應該剷除嘅，係你自己。

呢個世界上，對環境造成最大滋擾嘅，一定係人類。你砍伐樹木，令無數動物無家可歸，破壞生態鏈。木棉花絮唔准飄、夏天蟬唔准叫(因為嘈親你訓覺)、雀唔准大便(因為整污槽d地方又傳播病毒)，d樹木雀鳥有冇出過聲？有冇得話覺得你人類太多，所以要求你地絕育？又或者投訴人類迫遷、強拍、扼殺動物基本權利，然後要求剷除人類？

轉個頭你搞到空氣污染影響健康，又話樹木好，樹木可以改善空氣質素，要求做多d綠化。到你良心發現，開始懷念鳥叫蟬鳴，就整個公園將所有你想見到嘅野放晒入去，等你得閒嘅時候帶埋一家大細去睇，同d仔女講「嗱，呢隻就係蟬囉，佢地夏天會叫架」、「果隻就係雀，佢地喺天空度飛架~~~」，叫佢地要愛護大自然。但另一邊廂如果蟬喺你屋企附近叫，雀大便痾中你晾衫架件衫，你就恨不得「一隻手指捽死佢」。

我以前住嘅地方，回家有一條必經嘅路，路上有五六棵木棉，每年開花，每年有花絮飄落，我覺得花絮係人間美景。我有鼻敏感，但真係從來冇諗過要剷除d木棉嚟避免自己敏感。我讀既中學有個後山，係法定保護區，好多候鳥棲息，好多白鷺飛來飛去。每朝我地全校喺後山旁邊嘅操場集合，d雀仔喺頭頂飛過，中頭獎、踩地雷，並不出奇，我都中過兩次。每逢繁殖季節，後山we wa鬼叫，傳到去課室。七年裡，我從來無聽過有同學(或者同學嘅父母)投訴過。

我曾經以為一切都係理所當然，依家我發覺我要為我身邊嘅人都係正常人感到慶幸。

她的18歲生日願望

父母有班固定的飯腳，也有一個固定的飯竇，一星期總有幾天會在一家小廚吃晚飯。

那天我們一家連同父母的飯腳們，在飯竇慶祝生日。其實，這場生日飯局已搞了很多年，因為我們10個人當中，有4個都是3月生日的。每年如是，有好味的菜，好味的生日蛋糕。一千多元的晚飯，吃得很滿足。

我們會將生日蛋糕分給飯竇的伙計、附近相熟的食客，每年如是。

今年，拿到雪糕蛋糕的人包括飯竇的年輕女伙計。這飯竇我來過無數次，但一直沒有留意到她。直至她這次走近我們那一圍，雙手接過蛋糕，大聲說「真係請我食架？」、「嘩我好開心呀！多謝你地呀！」，食完後，走過來說「真係好好味呀，多謝晒你地！」。她的笑容引起我的注意，因為那實在是太真心的笑容了。我有多久沒有見過一個人為吃到一件雪糕蛋糕而這麼高興？老實說，第一下實在是有點訝異，一件小蛋糕而已，用不著開心成這個樣子吧？

於是，大家開始討論這位年輕的小伙計，說看到她的笑容，連自己都覺得開心。原來，她只得17歲。瘦小的、皮膚白白的、打扮很樸素。你未必會對她的外表留下深刻印象，但一定會留意到她響亮的聲音，很精神，很cheerful的。

17歲，我在準備會考，她已經在這小廚工作了接近兩年。父母的朋友說，她只讀到中二，就出來工作 (不是犯法的嗎？)。自小父母離異，爸爸在大陸有另一頭家，她和哥哥跟著媽媽生活。無奈媽媽只疼哥哥，將所有好的都給哥哥，供他讀書，好吃的留給他。她呢？細細個出來打工，一個女孩子，甚麼都不懂，在食肆執頭執尾。媽媽要她每月拿$7000回家，全部花在賭枱上，從不噓寒問暖，從不為她煮一頓飯。拿不到$7000回家就罵她。有時，媽媽還會找上門，問她拿錢。熟客們都見過她哭，開解過她，聽過她傾訴。每次，她哭完之後，自己收拾一下心情，就去繼續工作。

17歲，我考完會考，用暑期工賺來的錢，去了北京旅行(還瞞著父母一個人stay behind留在北京多玩幾天)。她呢，有假期不放，寧願老闆讓她上班，讓她可以多賺一點錢給自己當零用。一個月30天，每天10個小時 (12:30到10:30的黃金時間)，她都在小廚工作。老闆很喜歡她，因為她工作勤快不偷懶，而且人又純品不狡猾。一個月薪金$9000，$7000給了媽媽(部分間接給了哥哥)，剩下$2000，要支付每天約$25的交通費、三餐支出。媽媽不准她去玩，規定她放工要即時回家，否則不讓她進門。回家還要做家務。她連買件衣服，都要計過度過。

17歲，幾多生於香港的孩子，是父母的心肝寶貝，有工人服侍，要乜有乜。

小廚的熟客們看不過眼，有時會特意買零食給她(她喜歡食朱古力但又捨不得買)，過時過節會塞一百幾十給她買件新衫；有人想過報警、去找社工、去找她媽媽理論，但最後都因怕幫倒忙而放棄。

或許有人會說，比起非洲的兒童連食都冇得食，她還是比較幸福的。我認為根本是橙和蘋果，無法比較的。

非洲的兒童固然值得同情，但他們的世界，所有人如是，沒有甚麼差距。就算有，至少落差沒有那麼大。活在香港這個如此繁榮的城市，人家都說港孩被寵壞的同時，她被誰疼愛過？在小廚工作，每日見盡幾多樂也融融的家庭在這裡慶祝生日，幾多良朋把酒言歡，當中不少都同樣是17歲吧？周圍的環境總是那麼熱鬧烘烘，內心的寒意應該難以言喻吧？

她一直期待自己的18歲生日，因為那是她給自己的一條界線。到時候，她就是成人，可以脫離媽媽，過自己的生活。這就是她18歲的生日願望。

阿才的店可能被都更了

阿才的店門外小小的招牌

上個月帶左一班長輩去台灣之後，大家仍回味無窮，嚷著要睇相 (其實我真係想同佢地講，我地依家唔興睇相同晒相架喇。無奈佢地個個冇FACEBOOK，又唔識用EMAIL，唔可以UPLOAD上網TAG佢地就算)。我父親大人教落，凡事以長輩為先。我呢位做後輩嘅，當然要走多一步，做多少少去配合佢地啦。

話說回來，以前數碼相機未盛行，仲興跟團去旅行嘅時候，真係會晒番D相出嚟，仲會約埋D團友出來飲茶睇相，我仲聽過唔少團友發展成情侶嘅故事，諗番起都係好特別嘅回憶，去到我呢D 「掹車邊」80後就成絕唱。

人大左，回憶愈多，感慨愈多。好多野你見證佢出現，又睇住佢消失，會覺得有D唏噓。有人話，因為人有感情，一路都存在嘅人或物，突然間話要消失，當然會不習慣。亦有人話，人年紀愈大，愈覺得自己被時代淘汰，所以當有一D具象徵意義嘅事物將要消失時，會好想去捍衛，因為保得住呢D舊有嘅事物，某程度上亦肯定左自己嘅存在價值。

今日睇報紙，見到這樣的標題「阿才的店傳都更 學運世代感傷」。不會吧？早兩個星期先至帶左一班長輩去呢度食飯，依家又話要拆？「都更」近排成為熱話，北市王家抗戰到最後，都係保唔住百年老宅，實在令人感傷。到底城市的保育同發展，是否必須永遠對立？城市的保育，其實會唔會係發展嘅一種方式？反過來睇，發展又往往係市民嘅意願。好似王家都更案，大多數附近嘅居民都接受政府同發展商嘅收地同賠償，某程度上亦反映左佢地其實係想收地。喺呢D議題上，何謂人權 (邊個嘅人權較為重要？)？何謂公平公義(對一方公平公義，會唔會對另一方就唔公平唔公義)？何謂有利城市發展 (邊個方案最有利？係唔係多數人喜歡嘅方案就一定有利)？


似乎愈講愈遠，都係BACK TO THE TOPIC。

幾十年歷史嘅阿才的店，係食台灣快炒現炒嘅好地方。到底快炒即係乜？我冇深究過，憑個人經驗，我覺得係等於香港食本地小菜嘅舖頭。阿才的店位於仁愛路，唔近捷運，位置不好找，都幾隱蔽，附近環境又靜，真係唔講唔知佢係一間食肆果隻。不過，一打開門，晚晚高朋滿座，笑聲不斷，唔鐘意熱鬧千祈唔好幫襯。晚飯時間最好訂位，否則就要睇閣下運氣。

阿才的店門外 - 殘殘舊舊又隱薇，別有一番風味。小小的店分兩層，燈火通明，非常熱鬧。

阿才的店之所以咁有名，除左價廉物美之外，仲有店內的古早擺設同裝潢。店內每件傢俬同裝飾都係古董，加上有好多幾十年前嘅電影海報，我班長輩團友即刻好似年青左幾十年，個個都喺度想當年。

擔櫈仔，排排坐

最年長又最鬼馬嘅團友「夫人」即刻話要學電影海報女主角擺番個POST影相

「集中意志，全力喝酒」、「快快樂樂喝酒，平平安安回家」，是阿才的店嘅招牌口號，啱晒我呢班無酒不歡嘅長輩心意。事實上，呢度枱枱都好似要隊番一打半打台啤先至安樂咁，就連平時唔好啤酒嘅我，都飲左成支。無辦法，氣氛使然。睇番D歷史，原來阿才的店係唔少從政嘅人嘅聚腳地，佢地鐘意喺度論政，陳水扁同馬英九都曾是座上客。另外亦係好多文化人，包括導演等幫襯既地方，怪唔知得成日都咁熱鬧。

我地呢次坐樓上櫈仔位置，伙計得一兩位，負責埋上下兩層，所以佢地成日都好忙，有時叫幾次先應你，上菜亦唔快，所以最好就係先叫幾支啤酒同埋叫碟花生食住先。呢度嘅現炒分大細，大200台幣，細100，都幾抵食。我對住張菜單係咁剔，剔左好多碟，伙計見我叫左咁多野，就建議我將全部野轉晒做細，唔係食唔晒。雖然每碟份量唔多，但一人食D，樣樣食D，叫多幾樣，大家食到捧住個肚行出來，埋單都係約2500台幣(9個人)。

未開飯，先來一碟特大花生。花生比一般大粒有肉，甘脆中帶點甜味，很好吃

綜合滷味，跟一般在香港和台灣吃到的滷味不同，外加大量蔥花、蒜蓉和少量辣椒，超惹味

炸肥腸，中間夾大蒜，配上淮鹽，香口酥脆

特式菜咸蛋白苦瓜

招牌菜油條蝦仁

麻婆豆腐

鹽酥龍珠(墨魚咀)，超正!

客家小炒

蚵仔酥

皮蛋地瓜葉鍋

芥菜鍋

賣相唔突出，但味道超好既干扁四季豆

邊隊啤，邊吹水，邊吃現炒，過癮！

其他推介菜式：香酥鴨 (我地好彩叫到最後半隻，鴨皮酥脆但鴨肉唔乾又夠味，好食！)、豬油撈飯、牛三寶(牛雜)、麻辣腸雜！

同長輩去台灣旅行，跟團既，好多都話D野唔啱食(梗係啦，成日都食團餐)，自由行既，一樣都係唔啱食。有時覺得好廢解，明明台灣咁多好野食，點解佢地會話冇啖好食？無他，因為長輩們唔同我地D後生，佢地係絕對唔鐘意夜市食物(一日半日尚可)，要知道佢地行一陣就會攰(唔似我地精力旺盛，玩左成日都仲可以行幾個鐘夜市)，唔鐘意排隊(鼎泰豐香港都有，排一大輪一D都唔impressive)，隔一陣就要去廁所，又抵唔住太熱，又唔可以太凍，唔係好易病。太高級嘅又未必啱，因為太拘謹。佢地始終係鐘意一個感覺輕鬆，可以坐低慢慢食同埋吹水嘅地方。所以，不妨花點心思，揾個可以俾佢地坐低好好食一餐嘅地方。

阿才的店周日公休，其他日子開11:30am-2:00pm，5:00pm-2:00am，好似我地咁慢慢食3個鐘晚飯、落機嚟食宵夜，或者長輩行完夜市食唔飽，都係唔錯既選擇。希望佢唔會被都更啦！(老闆話若然要結業，一定會搞一次臨別請客人食飯嘅party！)

電話
店址	台北市大安區仁愛路二段41巷17號