遊台灣．捐發票

二聯式發票，記住KEEP!
上方紅紅地色o既就係統一編號。

有冇發覺，去台灣買野，一係冇發票，一係就會收到款式幾乎一樣(多數係長條型)o既發票，即係二聯式發票(左圖)。另一種比較少見既就好似信用卡存根咁既樣，就係三聯式發票(下圖)。另外仲有幾種唔同o既發票，性質同詳情都唔多講喇。

呢d其實係「統一發票」。根據 wikipedia o既資料，「統一發票」係指台灣私人營利機構或公用事業機構銷售貨物或提供勞務給消費者後，營業人與買受人雙方分別保存與收執的制式憑證。唔....即係單囉。o係台灣做生意係要交營業稅，所以凡係有統一發票既銷售點，都有根有據，依法納稅。事實上，營業稅亦係台灣財政部o既主要收入來源之一。不過，如果購物額少過台幣50元，除非顧客要求，否則可以不發。

每張「統一發票」都有一個統一編號。如果你手持二聯式發票，千祈唔好睇小佢，亦唔好亂咁丟。分分鐘你會靠佢發左達，真係食粥食飯都睇佢。

統一發票o係50年代已開始實行，到80年代，政府為左鼓勵人民多d使用，就推出左抽獎。現時凡單數月份o既25號開彩，頭獎由200萬台幣到1000萬台幣都有，安慰獎都有200台幣，而且中獎率算幾高，大約係千分之三(0.3%)。

玩法好簡單，就係對統一編號，每次主辦單位都會抽出幾組號碼(特別日子可能會多d)，中晒八個字就中頭獎，如此類推，中尾三字就得六獎。想check下中唔中，去呢個網頁就知。得獎者一般可以去全國郵政局攞獎，好方便。

三聯式發票

講開中獎，幾年前我o係payeasy網上購物，由於o係網上，佢地冇出發票俾我。點知好幾個月之後，佢o地通知我我中左六獎，仲叫我去攞獎。當時我至知原來比較有規模o既網上公司，都會有幫客人對發票o既服務，不過最後我冇攞。

正因為發票有機會中獎，所以有唔少社福機構都會募捐發票，最常見就係o係便利店o既募捐箱，透明一大個的，所以我叫大家唔好亂丟。

基本上，每次去台灣我都會集齊晒d發票，一見到有募捐箱就捐晒佢；如果同一班人一齊去，我亦會主動請其他人將發票捐比我去捐。一來可以做下善事，二來取之斯用之斯，如果可以幫到台灣改善社會，何樂而不為？

2012年12月18日開始，台灣會逐步推行電子統一發票，最初o係7-11同萊爾富等27個據點試行。到時，大家可以選擇捐發票，又或者將資料輸入手機、悠遊卡、大型公司會員卡等等，咁就可以直接check 到中唔中。值得一提o既係，推行電子統一發票之後，預計每年可以節省80億張紙發票，同埋20億台幣o既郵寄發票成本。

下次去台灣，記住捐發票喇。

圖片來源：wikipedia