百物騰貴，以前屋企乜都係媽咪搞掂，我只係成日聽佢講「一包米以前五十幾，依家八九十」、「d油貴左成倍」、「三十蚊得果少少牛肉」，然後應一句「嘩，真係好貴喎」，其實係完全冇肉赤既感覺。
直至近排搬左出嚟住，終於體會到d野係幾咁貴，直情係有切膚之痛。就好似早排我貪方便o係百佳買左兩支洗頭水($59.9一支，即係$119.8)，過兩日見到隔離街藥房賣$48支，轉個頭發現對面萬寧特價 $89.9兩支。兩個月唔夠，我已經感受到持家係一門幾咁高深既學問(以前我都識講，不過真係冇親身體會過)。所以，我真係好佩服好感激我媽咪，又要返工，又要煮飯，又要打理家頭細務，又要照顧我地三姐弟。
講番百物騰貴，唔好話人計埋d師奶數、婆「也母」數，樣樣都幾蚊十幾蚊(甚至幾百蚊)，加加埋埋其實真係唔少錢。
噚日，我好朋友同我講，佢o係銅鑼灣一間藥房用$18蚊買左一pack 18包既Tempo 細包裝紙巾，佢當時既諗法係，「x (唔係粗口) !平均$1蚊一包，我平時o係便利店、報紙檔講緊$3一包喎，簡直係謀取暴利呀！」
聽到佢咁講，我心裡面有陣涼風吹過 (沾沾 ^3^) (終於有得認叻)。然後，我同佢講，
「你真係食米唔知米貴。$18都已經買貴左啦！我o係藥房見到$24-$28(最貴)已經有一pack 36包喇！」 $24蚊一 pack，平均6毫幾一包咋！
6毫幾同3蚊，5倍價錢！
最近無線重播《師奶兵團》，有一集講商天鵝、鄧萃雯、葉童 (佢三個真係好戲，尤其係鵝姐) 三個湊完d仔女返學之後，各自分頭去格價，然後互相通傳，同埋幫大家買 (團購其實係由師奶發明)，最後gather一齊分贓，計番條數，慳左百幾蚊！三個人興奮到跳起！(當時我都好替佢好興奮(幾投入！)，哈哈)
咁啱平時鐘意行高檔超市既姜大衞行過，對於佢地既行為嗤之以鼻。鄧萃雯於是好心教精佢，去到街市唔講價，d老闆一定食硬你。佢仲講左句，「一個月慳幾百蚊，一年係幾千蚊，十年就幾萬蚊，夠你果女入大學交學費。」
當時我諗，又幾有道理喎。好多父母可能就係咁，慳左d仔女既大學學費出嚟。
當然，我又唔會好似佢地咁，亦冇時間去做咁多research。Time is money！好多時我都寧願比貴d去買多d時間。但係，其實有好多慳錢方法係好方便又容易，如果唔係麻煩既，點解唔慳左佢？
Value for money 係我一直奉行既消費原則。我唔介意洗錢，不過要洗得「值」。如果我要比 $5000蚊住間酒店，就要住間值 $5000蚊既，而唔係齋俾貴錢買貴野。同樣，比幾百蚊甚至幾千蚊去做spa，做完都唔覺得舒服既，咁點解唔去間肯定唔會差既？簡單如我要飲杯奶茶，成條街都係茶餐廳，大家都收$12蚊杯，點解唔揀間好飲既？如果你話，有間收 $20但真係超好飲，我又唔介意去飲喎。
不過，當年讀 econ 都有講啦，information cost係一個issue，如果要花時間去揾最值既野，計落個cost可能仲大。 咁所以，團結就是力量，分享就是力量，去旅行呀扮靚呀呢d，得閒同d朋友交流下，聽多d意見，日常生活既野問下媽咪問下老人家，公司附近有咩好食有咩百貨公司大減價，總會有同事話到比你知。
雖然如此，我同意亦欣賞每個人都總係會有d野令你無法抗拒，失去理智，唔理佢幾多錢，你都好想擁有佢，就算明知佢貴或者明知唔係必須都係要買。好似有d人死都要買支勁靚既鏡頭，死都要買個hermes birkin，死都要買好多書。我覺得完全冇問題，我地係人嚟架嘛，人就係咁，有七情六慾。就如談戀愛一樣，有時有d物質野都會令你不能自拔，係冇原因，亦唔需要有原因既。不過，唔好樣樣野都係咁就得喇，冇理由你會因為不能自拔而買左包貴幾倍既tempo卦？
