你身邊有無令你佩服得五體投地(Orz)嘅朋友？
我有個朋友，佢係我偶像。唔係因為佢高薪厚職 (如果佢想佢絕對可以)，亦唔係因為佢有咩豐功偉績(佢亦志不在此)，而係佢實現理想嘅無比決心。
我同佢同年入U，喺宿舍認識，到依家已有十年。剛識佢嘅時候只知道佢讀商科，係某種運動嘅star，份人活躍好動幾cheerful，醒目得嚟好謙虛(絕對唔係懶醒或者因為自己幾醒就沾沾自喜果類人)。機緣巧合下我成為左佢層樓阿飛（affiliated member），大家幾啱傾。當時我已經知佢好多嘢好想做好想試，好似好有理想咁(有邊個後生仔唔係丫？)。後來，佢冇住宿舍，我又忙住搞宿舍事務，大家好少聯絡，偶然從佢啲樓兄弟口中得知佢嘅近況，包括贏左個business比賽嘅大獎，去左肯亞同關島做交換生，入左某大投資銀行做intern等等。
同佢接觸番係畢業後嘅事，當時佢已經喺某大投資銀行做緊，而我就係記者一名。好多人羡慕佢「高薪厚職」(當時雷曼都未出事，經濟仲勁好景咁)，但我就好記得佢用「行屍走肉」嚟形容佢自己嘅生活 (幾多父母用大半世栽培啲仔女都係為左仔女可以「行屍走肉」-__-)。佢話雖然自覺好幸運有呢份工，因為佢家境不算很好，而份工就喺經濟上幫到佢好多，令佢可以慢慢安頓好屋企，但佢做緊嘅完全唔係自己想做嘅嘢。佢真正嘅夢想就係去戰地／第三世界國家從事國際救援工作。
嘩！好多人可能都曾經想過（只係想過）做呢種咁有理想嘅工，包括我在內，但試問有幾多人真係有勇氣（放棄既有嘅一切，包括可能已經幾高嘅生活質素、生活模式、家庭、工作，去一個陌生、可能有生命危險、可能冇舒適溫暖嘅家嘅地方）同決心（包括抵受身邊好多人嘅質疑、反對，同埋投身呢行要花嘅時間心機要鋪嘅路，雖則呢行風險高又危險又唔會發達，但要入行都真係唔易）。多少人就連轉工要send resume都提唔起勁，多少人嘅理想埋葬喺日復日年復年嘅營營役役之中？
後來，佢同我講，佢已經辭左職，因為佢已經儲夠錢供養屋企一段長時間(我仲記得佢話自己辭左職果副開心嘅表情)，依家佢好努力咁操緊日文，因為佢打算考日本政府比海外人士嘅獎學金，去日本讀書。由於面試要考日文。佢本身雖然識日文，但已經生疏，所以佢要努力地準備。結果，佢攞左full scholarship，負笈早稻田大學修讀東亞研究碩士課程。
一般人如我，考到scholarship之後，就會專心去讀書，俾自己稍為休息一下，日後再作打算。非一般人如我個friend，好快就同我講佢下一步嘅計劃，同埋佢點樣努力地向夢想邁進。
有一次佢返香港，咁啱我同佢有一個common friend (係一個攝記)，所以約出來見面，同場仲有著名本地女戰地記者。我哋四個人就喺旺角女人街一間up dup上海菜館討論中東局勢(因為戰地記者啱啱出左本書)同埋戰地記者嘅所見所聞 (才疏學淺又見識少嘅我簡直係撘唔上咀，只能講啲好皮毛嘅嘢同埋聽)。一張枱四個人，一個已經走緊自己要走嘅路；攝記就話將會去第三世國家拍攝，同埋會拍一套獨立短片，探討貧窮問題(舊年，攝記嘅影展喺FCC舉行。今年，佢出埋影集，再辦影展)；我呢位朋友就同我講，佢喺日本嘅老師介紹左佢去日本紅十字會幫手，輾轉有人叫佢去報考國際紅十字會(ICRC)嘅大使，佢知道左大使嘅工作性質之後，覺得就係自己夢想嘅工作，但係入ICRC必須操流利法文，所以佢好忙咁學習法文。為左學好法文，佢向早稻田大學申請延長學席，隻身去左巴黎生活9個月，用盡方法令自己可以操流利法文。
巴黎之後，佢返去日本完成課程，期間聽講佢去左北韓，搞國際政治斡旋(@_@ 呢個字好似只係會睇新聞時聽到，我諗我呢世人唯一會做嘅斡旋可能係我阿爸阿媽鬧交我做和事佬)。
後來法國紅十字會俾左個interview嘅機會佢，最後因為佢嘅法文未夠好，所以冇錄用佢。
同一時間，佢畢業了，適逢汶川大地震發生後有好多善後工作，佢就去左考香港紅十字會駐四川嘅post(佢見工前仲叫我幫佢check下cv同cover letter，唉，朋友，我睇住你份cv，睇到眼都凸埋，呢份工對你來講，根本毫無難度，你又駛乜擔心？況且，我又何德何能幫你check？)。結果，「托我鴻福」，佢考到份工，準備去四川。
平凡人如我，應該唔會走到呢一步，更何況下一步？佢同我講，其實唔駛佢講我都知，四川只係一個過渡。好似佢咁有理想嘅人，又點會甘於困喺四川這麼一個省？(世界上有好多地方比起四川需要援手啦)。
去到四川，法文未夠好嘅佢，去到邊都揸住本法文書，繼續日以繼夜學法文。有個去左四川探佢嘅朋友返來之後同我講，佢唔放過任何可以溫習嘅時間，無時無刻都喺度讀法文。
兩年後，佢已經係一個操流利法文嘅人(對我來講，廿幾三十歲人先來學新嘅語言，要講得流利，已經好難，佢仲要學左兩種)，我只係想像下已經諗到當中要有幾多能耐同埋決心。
今年9月，佢同我講，國際紅十字會包機票送佢去日內瓦interview ICRC大使嘅post，為期3整日，一日全英文，一日全法文，一日外展，仲要考餐桌禮儀 (因為作為ICRC大使將要出席好多國際場合)。對佢來講，今次不容有失，所以佢日夜埋首準備，心情好緊張。但係，interview咁啱撞左我婚禮，所以佢兌現唔到承諾，參加唔到我嘅婚禮。佢曾經問ICRC可唔可以改期，但因為呢幾日牽涉好多來自世界各地嘅人，冇可能改期。朋友，對比你嘅夢想，對比你將會做嘅嘢，我嘅婚禮算甚麼？不過係一餐飯。我同佢講笑，既然係咁，你更加唔可以失敗而回，否則就對我唔住！婚禮前一晚，我諗佢應該喺日內瓦為interview嘅事忙到死，但係佢都仲記得sms我。真係好感動。
一星期前，收到佢嘅email，「托我鴻福」，ICRC請左佢。我簡直開心到好似係我自己考到個post一樣。我諗，有咩會令你開心到好似自己實現左夢想一樣？就係見到你身邊嘅朋友實現夢想。朋友，你終於得左，你真係應得架！I am so proud of you!
幾個月後，佢將會去日內瓦受訓，之後就會post去 “a country where there is armed conflict or war”，而且會不停轉post。
望住ICRC delegate嘅 brief intro：
- Visit the prisoners of war and make sure that they do not suffer inhumane treatment
- Protect and evacuate civilians when they are under illegal attack
- Promote international humanitarian law to military and governments and make sure they know there is rule even in war
- Assist those civilians affected by war or armed conflict to rebuild their homes
就好似過去咁多年我每次見完佢一樣，每次都係一次思想衝擊，每次都覺得自己好渺小。你睇下人哋做緊乜？你睇下你自己？
記得去四川探過佢果位朋友有次同我食tea，俾我睇佢喺四川影嘅相。朋友影左一張相，係佢喺冰天雪地嘅山路上，走在前面嘅背影。朋友話，同佢相處感覺有點不平衡，因為佢總係走在前面，你永遠都追唔上，到你以為去到山頂，打算休息一下，佢已經準備好去征服下一個山。
如果人生有好多條線，我諗，喺夢想嘅呢條線上，我係永遠都無可能同佢並排。不過，命運註定唔同人有唔同嘅角色，其他人喺另一條線上，又會比佢走得更前。我一直深信，每個人都有一股力量，喺人生嘅某個層面上，令其他人嘅生命更加美麗，好似小孩之於父母，朋友/愛人之於你我。上天喺當中揀選好少部份人，要佢哋擔當更重要嘅角色 (我形容係「天使」)，用唔同嘅方式，為更大部分人嘅生命注入希望、力量同愛，好似德蘭修女、John Lennon、曼德拉。佢哋會提醒你，只要你肯，再難嘅事都有可能，同埋人生其實有更高層次嘅事物可以追求，你眼前嘅所謂困難、悲傷，其實冇咩大不了。
或者佢就係下一個世人嘅天使！(我知你睇到之後又會話我太抬舉你，你只不過係一個好平凡嘅人blahblahblah。但我想講，就係因為你覺得自己做緊嘅嘢冇乜大不了(而唔係自以為自己好偉大)，令我更加覺得你似一個天使)。
不過，喺夢想嘅線上，我冇打算要去追上佢。喺佢實現大夢想嘅同時，我會努力去追尋我一個又一個嘅小夢想(可能係manage好自己嘅life、可能係學好一門手藝)，然後因為實現左而覺得好滿足。同時，為左間接支持佢promote world peace，我會發少啲脾氣(正所謂家和萬事興!)。作為佢嘅朋友，我依然會慫恿佢參加我搞嘅台北勁hea勁食之旅 (朋友，take a break！)。
農曆年前聚會之後，下次唔知幾時先可以再見。唔知幾時先會有機會，同佢同成班人食飯睇世界盃無聊吹水。雖然喺夢想嘅呢條線上，我永遠落後，但喺生活小百科果條線上，我真係超前佢好多！起碼我知道五粮液係酒唔係雞翼。
註：由於我是單憑記憶寫，所以部分時序細節可能出錯，但大體是對的，請見諒。
註：由於我是單憑記憶寫，所以部分時序細節可能出錯，但大體是對的，請見諒。
