缺了的7和21

話說今年老弟生日，我在信和買了全套一共24本《男兒當入樽》送他。

買的當天因為時間匆匆，而且漫畫店早已預先將「全套」用透明膠袋包裝好，分成兩份，所以我沒有仔細檢查過就付錢。老闆給我一張EPS存根。我沒在意，就這樣離去了。

回家之後，拆開了第1-12期看(老弟不會介意的，嘻嘻！)。過了一天，看完第6期，我發現，原來沒有第7期!!!!!!!!!!!!!!!!我立即將「全套」拿出來併一下，原來第21期也缺了!!!!!!!!!!!!!!

老公第一時間問我：「有沒有保留單據？」

「根本沒有單據啊！只有EPS存根！」

接下來的一天，我們作了以下檢討 / 討論 / 行動：

• 雖然欠了兩期，但包裝是透明的，我作為客人沒有盡本份檢查貨品齊全便離去(等          同已收貨)，現在又反指缺期，人家拒絕補回/退款，也不是全無道理。
• 可是，我們不是騙他的，真的缺了兩期啊！(證據呢？)
• 老闆那天的態度不甚友善，說不定會堅持不補回/退款！(也對….)
• 而且，明明一套24本順著號碼包的，正常也不會遺漏呀。他會不會是故意的？
• 如果老闆堅持，那麼我們要跟他對質/理論嗎？(我是不是要激動一點，甚或在舖前大吵大鬧，等他為息事寧人而妥協？)
• 如果他死不妥協，我們要不要報警或者去消委會投訴？(那麼，證據呢？)
• 拆開了的那份，實在很難證明人家少給了第7期。另外一份沒拆開過，連膠紙也沒動過，至少可以證明是少了第21期呀。(為免老闆賴帳，我們把沒拆開的那份帶去，作為證據！)
• 就算老闆肯妥協，如果欠的兩期無貨，我們如何找回來也成問題 (後天就要送老弟了)！

第二天，我們捧著未拆開的11期《男兒當入樽》上班 (好重！)。另外，也為拆開了的第1-12期拍了照，顯示缺了第7期，打算到時給老闆看(雖然我深知那相片完全不能代表甚麼)。

萬一老闆不認，我也準備惡一點跟他理論，必要時告訴他我會去消委會投訴。

午飯時間，我約了老公(多個人，增加氣勢)，捧著那11期《男兒當入樽》，錢包裡放著那張證明不到甚麼的EPS存根。

老公先到。漫畫店在二樓。

到了。店還未開。

一鼓作氣，一來就洩氣

於是，我們約在外面吃點小食。

吃飯期間，我們討論等一下再上去。

我找來餐廳的點菜紙，寫了一個便條，如果等下過去店還未開，就留給老闆。大意是這樣的：

老闆，你好。我們是前天買了一套《男兒當入樽》的客人。因當天匆匆而來，沒有點算清楚書本的數目。回家後，才發現少了兩本(第7和第21期)，未知是否可補回？見字請電XXXX XXXX。

結帳之後，我們又回到信和。

在扶手梯上，我有點緊張。腦裡不斷在預演扮惡和發火對質的台詞……

到了，店開了！！！

我匆匆進去找老闆。

「老闆，我地早兩日買左成套《男兒當入樽》，少左兩本呀！」(心裡已準備萬一他不認就擺出一副兇相)

老闆望過來…….「係咩？」

我立即將手上未拆開的11本給他看，「你看，我們還未拆開的，少了第21期。」

老闆說：「哎呀，我知點解喇，之前收番來嘅時候因為怕搞亂，所以未齊都將佢地包埋一齊先，後來收齊晒又唔記得包番入去。真係唔好意思呀，你地唔駛咁辛苦捧返過來嘛，嚟講聲咪得囉。」

「我地怕你唔信我地嘛。」

「唔會。真係唔好意思要你地捧過來。少左第幾期話？」老闆說著已從店的天花找到幾期零散的《男兒當入樽》。

「7同21。」

「呢度仲有多本22期喎，你地肯定有？」

「係呀！唔該晒。」

「真係唔好意思呀。」

就這樣，沒有對質沒有發火，1分鐘內，事情完滿解決了。

事後我回想，人與人之間有時只講個「信」字。根本毋須把事情想得太複雜，也不是事事講證據。如果當初我發現缺期的時候，直接就覺得老闆會補償，過程中的忐忑和邏輯分析通通都可省回。

其實，世界上好人應該還是比壞人多吧？不論這是否真的，憑這種信念，至少會活得比較快樂。

以後唔再去睇海豚了

我係一個好鐘意動物嘅人，平時最鐘意就係睇動物紀錄片。細個好鐘意去動物園，大左之後雖然講唔上係抗拒，甚至入到動物園我都係會好興奮，但見到啲動物被困，心裡面會有少少矛盾同唔安樂，唔知咁樣係唔係對佢哋好。直至呢一刻，動物園我都仲係叫做可以接受嘅。不過，唔知幾時，可能我就突然接受唔到。好似2008年我去墾丁，喺海邊親眼見到有條活生生嘅海參喺我腳下出現之後，我就從此食唔落海參，甚至見到煮熟左嘅海參會有反胃嘅感覺。

你可能會話，車，你咁講，其實所有動物 / 生物都好慘，你應該去食齋啦。係，我承認我係幾矛盾，我暫時仲係選擇性地接受唔到自己食某啲動物 / 生物，但就仍然肆無忌憚地食豬牛羊雞魚。不過，我唔排除有朝一日我又會叮一聲忽然以後唔再忍心食佢地都唔定。

話說今次九州之旅，我哋出左海去睇海豚。其實呢次已經唔係我第一次睇海豚，幾年前喺台灣花蓮，我已經參加過一個觀鯨/觀豚嘅trip。不過，上次嘅感覺無今次咁深刻，impact無咁大，事後檢討，我諗係同主辦單位嘅安排有關。

花蓮果次，作為一個參加者來講，係無咁好玩。一來隻船大，成幾十人，又同海豚距離好遠，只係遠觀。日本呢次，比較抵玩，因為船同海豚好近，基本上就係你前面游來游去。開始嘅時候，都幾開心，因為真係可以好近咁睇到海豚，就連佢地身上有嘅花痕都睇到，呼吸聲亦聽到。但係，過左15分鐘，我個心就開始唔舒服，亦喪失左影相既興致，因為，我著實覺得自己在騷擾海豚。

日本嘅安排同台灣不同之處，係佢地會用好細嘅船。我地觀豚當日，有5隻船同一時間在觀賞同一群海豚，每隻船平均幾個客人。d船開得好近，基本上係5隻船不斷地在追逐這群海豚。佢地遊向東，我地就駛向東，將佢地包圍；佢地轉向，我地又轉。相對而言，我地隻船算係比較considerate，一直同海豚群保持約10米嘅距離。於是，我開始問，有必要嗎？我地唔係騷擾緊佢地係咩？觀豚唔係都應該有manner架咩？例如觀賞距離、時間等等，有無限制呢？就係咁，一直唔多安樂。回程嘅時候，遇上另一group正在出海觀豚嘅人，心裡更覺唔安樂。這些海豚每日就係咁不停地被輪流騷擾嗎？當日晚上，上網又咁啱睇到一段片，控訴日本人殘酷對待海豚，包括將佢地困在一個地方虐殺。雖然觀豚未至於虐殺，但係換個角度睇，呢種安排會唔會係慢性謀殺？你可能覺得我誇張左，但我心裡面確係有咁嘅感覺。

返到香港，都仲係諗起呢件事。於是，我上網research有關觀賞海豚嘅守則，發現香港同世界各地都有一啲 code of conduct，概括如下：

觀豚守則
- 基本原則：必須離遠觀看，不要試圖觸摸、餵飼或傷害野生海豚。
- 發現海豚後，應緩慢穩定地前進或停船，不要突然改變方向，或企圖切入海豚游弋的路線。
- 在海豚五百米範圍內，同一時間只可有一艘觀豚船，其他觀豚船隻應在觀豚範圍外停船等待，切勿同時圍觀一群海豚。
- 接近海豚時，應以低速與海豚並行，不可迎面駛向海豚，只能以斜角從旁靠近，切勿突然改變航行方向和倒後行駛。
- 在航行途中，如海豚游近觀豚船一百米以內，船主應小心留意，並以低速穏定地前進，直至海豚與觀豚船距離超過一百米。
- 切勿把海豚母子分開，也不可追逐海豚，或迫使牠們游往船隻、魚網及岸邊淺水處。
- 觀豚時，船速不能超過五海里，與海豚應保持最少五十米的距離。

好明顯，我有份參與騷擾海豚。我諗，經過今次之後，睇海豚同食海參對我來講已經劃上等號了。

朋友們，你地日後睇海豚或許其他動物嘅話，請盡量選擇一間安排較人道嘅公司。

我的家園大埔

其實，我真係好鐘意大埔。

我出世幾個月就住大埔，直至中五先至搬去第區。

我喺度讀幼稚園、小學、中學，渡過左我人生最無聊嘅10幾年。我成日話，人生最奢侈嘅時候就係讀小學、中學嘅時候，因為果時唔知點解你會有無限嘅時間同精力，做好多好無聊嘅事。人生除左頭果十幾年同尾果十幾年之外，有幾可可以咁無聊？

好似我咁，幼稚園嘅時候就住喺吐露港旁邊嘅工業邨旁邊，日日無所事事，同班細路一齊捉金龜放入個盒度，之後又放生。傻下傻下咁無目的無定向跑來跑去，玩「伏呢呢」、「狐狸先生幾多點」。

小學放學返屋企睇430穿梭機，同隔離屋啲細路扮開超級市場、扮結婚、拍閃咭、偷偷落街買零食。果時我哋唔駛學野唔駛報學校都寫CV (我學琴只為學琴，學跳舞只為學跳舞，就係咁簡單)，唔駛上playgroup，唔駛補習，不知幾快活。我間小學嘅校長好鐘意填詞，不過佢自己可能無發現，填詞從來都只係佢興趣，唔係佢專長。成首歌無一個字係啱音。佢成日攞我哋呢班細路做白老鼠，校歌又係佢、校監榮獲MBE首歌又係佢。記得有一年我哋舞蹈團要同大埔兒童合唱團上大陸表演，校長就作左首「我的家園大埔」，歌頌大埔嘅美好。果時我哋日日綵排，首歌入晒腦，到依家我都仲識唱。

校歌第一句，就係「山長水遠，大埔景色多壯麗」。我可能因此被洗腦，細細個開始就好鐘意大埔，覺得呢度好靚。有八仙嶺，有吐露港，有好多好野食，有好街坊、好朋友。

中學嘅時候，聽四大天王、追偶像、睇左N咁多本小說漫畫，日日放學唔想番屋企，就同同學行勻成個大埔。我學校好近大埔火車站，我通常放學會先去火車站上蓋嘅新達廣場食個TEA，然後再經大埔墟，行去大埔中心，有時會去同學屋企玩，之後再行番去火車站。放假去同學屋企打牌、打機、同屋企人去大尾督燒野食，去漁排捉魚、去林村許願樹、食盤菜、有時去行山，去吐露港踩單車(果陣時未有隔音屏、科學園同樓盤，成條海岸線都係屬於市民架)。每年中秋節，同同學約埋去大埔海濱公園煲蠟。

以前我以為係人都識踩單車，因為大埔人個個都識嘛，點知原來唔係。後來我仲發現，原來有啲香港島同九龍嘅學校秋季旅行會去大尾督架。我仲以為所有喺大尾督燒野食嘅人都係大埔人。

因為，我去呢啲地方，真係好似踢拖落樓下7仔買支汽水咁嘅心情架咋，呢度我主場嘛。

喺大埔成長，所以真係街坊處處，行到邊都遇到識嘅人。好似依家好多報導嘅街市大樓熟食區，大部分檔口我都係由細食到大，由以前搭出來嘅臨時街市(臨時左好多年)，$3一包排骨飯，食到依家$14。茶水檔夫婦個女同我同年，老闆仔女結婚、抱孫擺酒、到老闆葬禮，我地都係座上客。所有人，都係大埔街坊。

就算無住大埔咁多年，我都覺得，大埔是我家。

雖然校長嘅「我的家園大埔」完全唔啱音，但係單以文字來講其實唔錯架，好真實，好浪漫：

當我漫步林村  山谷風光美妙

綠蔭樹影婆娑  山溪流水淙淙

野花清又芬芳  閃耀金光一片

多麼美好我的家園

大陽東方升起  金光照耀天際

海面波光閃閃  漁舟帆影點點

高樓大廈林立  廣福大元富善

多麼美好我的家園

(仲有二部輪唱添)

美好的家園大埔 (美好的家園，溫暖的家園)) 

由林村山谷到八仙嶺巔 (由林村山谷 直到八仙嶺巔)

環繞  吐露海港 

我知道多麼美好  我的家園

就係咁，由小學開始，我就覺得大埔是我家。到依家，我都仲想有朝一日搬返去住。

最近睇報紙先知，原來龍尾要起人工海灘。

「曾德成指大埔區議會已就事件討論70多次，項目也通過環評等法定程序，為北區、大埔及沙田約120萬名居民建一個人工泳灘是「有長期訴求」，至於烏溪沙自然海岸，政府不考慮理由是「沙田區議會未討論過」。政府指龍尾有三種具保育價值的魚，包括星點多紀魨、賴氏綠巢鰕虎魚、雙斑舌鰕虎魚值得保留，但不包括管海馬，工程前會將生物遷移至汀角東等地區，減低生態影響。」

政府話人工海灘係有「切實需要」，其實有咩「切實需要」呢？「切實需要」唔係講緊一啲個社區大部分人都需要或者無左真係好唔方便嘅野咩？例如公路、醫院、街市、運動場所、圖書館？幾時連沙灘都係有「切實需要」嘅野？無左沙灘唔通我地生活唔到？上天無俾一個自然沙灘呢個區，咁咪去有海灘既地方囉，香港有幾大？唔通每個區我地都要造一個出來？

唉，枉我自詡為大埔人，對呢件事竟然一啲都唔知？政府已經通過所有既定程序，喺區議會亦有討論，是否再一次證明，議會已無法切實反映市民意見？自己無出一分力去參與，實在內疚，依家似乎無得返轉頭，真係好心痛。我地真係無得返轉頭嗎？如果係真，咁我地之後要點做先可以保衞到呢個美好嘅家園？

執膠

兩格階磚咁大嘅沙，挖到10CM深，10分鐘，已經有咁多。

唔知上天係攞景定贈興，香港正值多事之秋，送我地一個膠災 (唔係金銀銅鐵錫，偏偏要是膠，仲要偏偏到來香港呢個地方，換著係其他華文地區，例如大陸普遍地區、台灣，大家對膠字都唔會有深刻既體會，真係巧合到)~ 。

到底膠粒對魚有冇害，似乎就眾說紛紜。對我來講，我就唔會因此而唔食魚。我關注嘅係，個海有咁多膠，沙灘又有咁多膠，都係UNDESIRABLE。

所以，同老公夾好時間，星期日一齊去執膠。之前一日Check左話長洲東灣有好多膠粒未清，所以就選呢個地方。一抵步，已有唔少義工同自來的市民在執膠。隨便找個地方，坐低一望，嘩嘩嘩，真係好多。

基本上，只要用手輕輕喺沙上撥一下，平均就會見到1-2粒膠。膠粒數目之多，我哋都好驚訝，無諗過事情都過左咁耐，都仲可以成個沙灘都係膠粒。

執膠嘅人大部分都係後生仔，成班friend一齊來執，仲有一d一家大細，我見d細路仔都執得好開心，好似好enjoy咁。

執完膠，飲杯冰凍可樂，食串長洲大魚旦，再喺長洲兜個圏，感覺真好。

如果你曾經享受過香港沙灘嘅美，如果你珍惜呢片土地，都請你出一分力，雖然感覺像愚公移山，但連愚公都無，座山就郁都唔會郁。

無論係家庭樂、情侶拍拖，都可以考慮下去執膠。

下星期六日都仲有清潔行動，ACTION NOW!

台灣機票3送1

寫呢個題目之前其實掙扎過一輪(早於五月份我已經想寫)，但因為覺得好難解釋得清楚，而且題目又唔多有趣，寫左又改變唔到事實，後來工作較忙，順理成章擱置左一排。依家得閒番啲，而且最近又同朋友講起呢件事，諗諗下，不如都係寫啦。

事情已過去，諗番轉頭，我自己都好驚訝點解我咁好心機走去同台灣觀光協會溝通。我諗如果件事唔係同台灣有關，我真係晨早放棄左。另一個主因，我諗係同我嘅職業有關。我日日就係不停地去研究同調查「行政失當」，對於行政嘅事，會敏感啲。

2012年5月2日，收到 flyagain 嘅update，內容節錄係咁嘅(全文按此)：「之前曾經吹風話台灣觀光局會喺今年推出機票買3送1優惠（即係一年內去3次台灣，觀光局會送1張機票俾你），依家終於落實。港航已率先公佈詳情(同日港航網上公佈詳情)，而台灣觀光局香港分社已表明其他飛台灣嘅航空公司均適用。玩法係：只要你手持3張喺今年1/1 – 31/8期間飛去台灣（包括台北／台中／高雄）嘅登機証正本，加上其中一次入境及出境台證副本，就可以喺31/8前去駐港台灣觀光局......辦理申請」。

作為一個台灣粉絲，當日睇完呢段野，再睇埋港航個網頁，我即時有以下諗法：

• 好野，我已經去左3次。
• 5月先公佈，有效期追溯至1月1日，但又要登機證正本，又唔早講，唔知有冇keep晒tim~~
• 其中一次入境及出境台證副本？之前又唔講，有邊個會keep呀？但係好似有keep個未蓋印既pdf wor....

番到屋企，搵到4張屬於3次去台灣嘅登機證正本。

由於腦裡仲有好多疑問，5月3日，我email 觀光協會，問申請的詳細要求，同日獲覆：

2012年港澳人士持入出境證旅遊台灣3次以上者，第4次即有機會獲贈免費機票(未含稅)，申請辦法如下： 

1) 必須保留 3次到台灣來回登機證正本。
2) 3次旅台(入出)境證，只須保留其中1次之(入出)境證影印本,入境證副本上必須蓋有移民署印章(入境證在出發之前先自行影印留存，出境證至台灣過關後,可以用彩色(黑白)影印或數位相機，手機拍攝方式留存副本,完成旅程後再print out 即可)
3) 2012年01月1日起至 2012年8月31日止，名額有限派完即止。

3次來回登機證正本，即係6張，我得4張，即係無行啦。至此，我已打消換機票嘅念頭。

但係，一年會去3次台灣而且係網上辦理簽證嘅人，睇完以上嘅申請條件，應該立即就會發現一個問題，就係呢個申請辦法實際上根本係唔可行嘅。

問題就出喺「入境證副本必須蓋有印章」上。

大家試下回想台灣移民署入境時嘅程序 (都話我職業病架啦)：

出發前網上辦簽證 ---- 成功會獲發 入、出境證各一 --- print 入、出境證出來填好  --- 飛台灣
--- 去到移民署 counter --- 將護照連同入、出境證交比職員  ---  職員喺入境證上蓋印，然後直接收起入境證，俾番張出境證你 --- 過關

試問，旅客又點樣可以保留 已蓋印嘅入境證副本呢？當場問個移民局主任攞番嚟影張相或者叫佢幫我影印？

原本已經唔關我事，但係，基於我嘅一點關心，加埋一點職業病發作，再加埋少許唔甘心，所以，我回覆觀光局，指出佢嘅錯漏。

大約半個鐘頭之後，觀光局覆我，再次列出申請辦法：採納左我嘅意見，改成：

2) 3次旅台(入出)境證，只須保留其中1次之(入出)境證影印本,出境證副本上必須蓋有移民署印章(入境證在出發之前先自行影印留存不需蓋章)，但是出境證必須至台灣過關後,海關還給你時已蓋了章,即可以用彩色(黑白)影印或數位相機，手機拍攝方式留存副本,完成旅程後再print out 即可)

睇到呢度，我覺得，都好，起碼佢地係會聽意見，同埋會即時修改，效率好高。所以，我覆番佢地，多謝佢地，讚佢地效率高，表明我無打算要求佢地要修改申請條件，但係作出以下建議：

第時搞呢類活動嘅時候，盡量早啲公佈詳情，唔好好似今次咁，1月開始計，5月先公佈，好多人都唔會刻意留boarding pass , 或者，考慮接受電子機票，因為俾得錢買機票而實際上無去嘅人，又會有幾多個？(搞呢個活動目的好簡單，就係宣傳，答謝果啲成日去台灣嘅人，鼓勵人多啲去。機票數目有限，反正都講明先到先得，有必要搞到咁複雜嗎？)

觀光局好快就覆，話日後會考慮我嘅意見，另外，有2個重點：

• 有關3送1訊息在2011年12月中、2012年01月4日、02月24日共3次記者會上發佈。
• 開始參與航空公司，華航、長榮，接著 4月底香港航空加入，您們是看到香港航空之 廣告嗎 ? 之前大家可能忙著工作沒留意。

乜原來之前有公佈過咩？仲要咁多次？點解我日日睇報紙，又成日咁留意台灣新聞，都無見過相關報導呢？

所以，我竟然走去google yahoo search，去觀光局，甚至觀光協會自己果網頁，再睇埋華航、長榮網頁，睇晒最新消息、優惠活動、新聞等嘅messages，冇一個，係冇一個曾經提及呢個活動，更加唔駛講當中詳情。就算觀光協會自己個網頁，都係一隻字都無﹛。最終，我揾到一篇2011年12月嘅蘋果動新聞(文字只有20-30字)，講過話有3送1，但係，完全無提過如何申請、幾時開始實施。另外，我期期買嘅香港兩大旅遊雜誌，都未曾提過詳情。我真係好想知，喺5月2日香港航空公佈詳情之前，到底有咩人知道係點申請架呢？

況且，根據觀光協會5月3日俾我嘅回覆，當時嘅申請辦法對網上申請簽證嘅人來講，根本係唔可行嘅。如果之前有人換過機票或曾經有人問過，點解觀光協會一直無發現呢個問題？

做過下機構傳訊工作嘅人都知，一個機構今日開完記招，發晒新聞稿比記者之後，第一時間做咩？就係將消息上載自己官網。可惜，觀光協會冇做，其他官方機構亦冇做。最關心係咩？就係有冇人寫。所以，第二日例行動作，就係睇晒咁多個出席嘅傳媒機構嘅刊物、報紙，睇下反應，睇下有冇人報。如果冇人報，即係代表 - 無人會知。如果我係個公關，第日check番只得一段冇提詳情嘅蘋果動新聞，我諗我個記招可以講係失敗，咁就要諗下點補鑊，點make sure target audience會收到我想佢地知嘅消息。

有興趣嘅話，睇下其他香港人對呢件事有咩睇法，簡直係同我同出一轍。

你可以話，人地送俾你，原本你就無呢張機票架啦，人地鐘意點定申請詳情同規則都得架喎。係，從一個一般市民嘅角度，我完全同意，所以，我冇投訴，亦從來冇要求佢去修改。我只係從一個機構既行政角度出發，諗下將來再搞呢類活動點樣可以搞得好啲。

Anyway，既然佢地覺得已經做足晒，咁我就問，到底5月2日之前，其實我可以喺邊度睇到有關申請詳情嘅消息。

好快，我又收到回覆，post左幾條 link，全部都係我睇過嘅，除左蘋果動新聞之外，冇一段，係冇一段，早過5月2日出街。換著係佢老闆問佢呢個問題，佢又答成咁，你話嘔唔嘔血？

去到呢度，我覺得我對自己嘅容忍度已到極限，咁有耐性同佢講，咪又係對牛彈琴？

算了，我放棄對話。

聽講，最近觀光協會放寬左申請條件，可以酌情接受航空公司既登機證明(代替boarding pass)，算唔算係從善如流左少少咁多呢？

自家

爸爸朋友的自家咸肉糉同紅豆糭

端午節，應一下節，午餐在家吃糉。

新年、冬至、中秋做節，我明，但我真係唔明點解端午節都要大魚大肉咁做節。

人地屈原明明好慘啊，投河自盡，但我地千百年來都大魚大肉，到底為咩呢？唔通因為當年海入面d魚呀、蝦呀都食左屈原d肉，我地要為屈原報仇？如果係咁，我建議以後端午節都只係食海鮮!!!!

無所謂啦，我發覺，香港人包括我在內，做節已經做到好麻木，唔理佢咩節，總之係咪都做佢一做啦。反正，我諗做節本身嘅目的，都係一班人揾個理由聚一聚。

大同電鍋蒸糉，又好食，又方便

近年，父親大人每逢端午節，都會揾一位朋友幫手包糉(舊年包左200隻，今年100隻)。呢位阿姨做得一手好糭，特別是我最愛嘅咸肉糉，同媽咪最愛嘅紅豆糉，以前佢會幫人大量做，依家已經收山(因為覺得太辛苦)，全靠友情撘夠佢先肯出山幫爸爸整。

阿姨整嘅糭大小適中，糯米同餡料比例啱啱好，糯米又夠煙勒，有咬口，餡料又靚。包好後，用柴火燒。我用大同電鍋蒸熟後，箸葉嘅香味仲保存得到，好正，絕對係有錢都買唔到嘅味道。

人愈大，愈喜歡「自家」野。我一家人都鍾意食，對食有要求，所以喺食方面就更加鐘意「自家」。我諗我對食嘅要求，絕對係遺傳自我父母。

整色整水，都係一種滿足感。

在家下廚，除左要好食，我仲鐘意整色整水。對我來講，見到d食物擺出來好靚咁，已經好有滿足感。雖然對我老公來講，「咪又係糉同水餃~~~」，但係我就自得其樂。

襯埋一套係咪好靚呢？

好似今趟煮水餃，用朋友送的Le Creuset煲，同埋心型Le Creuset迷你小容器載糖，未食就已經覺得好開心。加埋同我個大同電鍋襯埋一套嘅迷你大同電鍋(碗子)，迷你外鍋載湯，迷你內鍋載食物，又靚又實用。

製作超精美的迷你大同電鍋，同真鍋一樣分內外鍋，內鍋上刻住「慶祝大同電鍋銷售1200萬台紀念」。超可愛。

點水餃用嘅醬汁，係用鎮江醋、麻油、頭抽同糖自家調製嘅，味道是100% tailor made，調到啱為止。

辣椒醬同紅酒一樣，要au，年代愈久愈好味

至於辣椒醬，係我家鄉嘅出品。呢款醬係我家鄉嘅獨門秘方，由於太好食，我以前成日用來撈飯。近年，家鄉開始發展，愈來愈多高樓大廈，我地開始擔心以後無得食，或者遲d冇人識整，所以就興起左返鄉下學整辣椒醬嘅念頭。不過，內地嘅長輩話，整辣椒醬最好嘅時候就係9月，但我舊年9月唔得閒，所以只得我爸爸返去學。結果佢學有所成，整左好多返來。下次可以教埋我。

學完辣椒醬之後，我爸爸又有新攪作，最近興養蜜蜂自己採蜜，仲話想整番個養蜂場，為自己人提供最優質嘅蜜糖。

我見到我爸爸生活咁寫意，真係好羨慕。不過，佢生活寫意，其實亦係我嘅福氣。

DBS Black Card 又有筍野

DBS Black Card 最新promotion

各位有志於儲mileage嘅朋友，如果你有聽我建議，申請左DBS Black Card 的話，就要留意佢又有筍嘢喇。(此post不適合去旅行唔會格價嘅人士觀看)


雖然以前已經聲明過，但我都係想再聲明多次，我冇收DBS錢寫嘢架~~~~ 


即日起至7月15日，打呢個電話2233 1888登記同輸入資料，然後簽賬滿$5000，就可以以 48DBS$，換到 1000 miles，另外送多50 miles。按此參閱詳情  


計一計，即係每簽賬 $5.7 (一般係 $6) ，就可以換到 1 mile。一張台灣機票 (15000 miles)，就要簽賬 $85,500 (一般係 $90,000)。已儲埋唔少 DBS$在手嘅朋友，係時候喇。快d行動啦!


提一提大家，打去之前，先決定自己要換幾多 miles，每1050 miles 為 1個單位，因為要喺電話即時輸入架。


雖然，mileage 長路漫漫，但點滴成金，大家一齊慢慢向目的地進發啦。


全年酒店94折優惠


已經夠 mileage 換左機票，或者訂左機票準備出發去旅行嘅朋友，唔好唔記得 DBS Black Card 同 agoda 嘅 joint-promotion呀。


2012年全年，只要透過呢條 link 進入 agoda 網頁 (留意：唔透過呢條link係唔得嘅)，就可以用 94折訂世界各地嘅酒店。

專屬link同agoda官網嘅分別就係右上角嘅Black Card IMAGE

agoda 有 best price guarantee，加埋個 94折，分分鐘平過直接同酒店 book，仲要有回贈(下次當錢用)。最好果樣嘢係，即時確認，部分酒店可以免費取消，而且乜咭都收(paypal都得)，flexibility 都多d。


根據我一貫做法，我會先check想訂嘅酒店嘅官網，再check埋 agoda比較下(我一般只會check呢兩個地方，唔會花時間再比較其他)。


點解要check酒店官網呢？因為只要你check下，就會發現好多時最平嘅係酒店官網，而唔係咩旅行社或者酒店網。


不過agoda同DBS Black Card今次呢個joint-promotion，又有d酒店真係可以平過官網喎 (但要留意cancellation policy因個別酒店而不同，大家要視乎自己情況去決定)。

本人就親身試過。(本人試訂嘅係最近住過嘅台北新酒店 amba 意舍 (此酒店自去年開業後一直高踞 agoda頭10名內，強烈推介!!)。只要透過上面條link入去，揀好晒酒店之後，跟住指示付款。當你一輸入左你張DBS Black Card 嘅號碼之後，畫面就會即時顯示 discount嘅價錢。

輸入左CREDIT CARD資料後，即時顯示綠色字部分就係DISCOUNT

試訂：7月21日(星期六) check-in 意舍中房 (1晚) - (連稅及所有其他費用)


官網價錢： $1142 (即時確認，台幣4400)
                    取消政策：8日前免費取消


agoda價錢：$1080 (即時確認，另有回贈$43下次booking用)
取消政策：4日前取消，收美金15元手續費


                     $1245 (即時確認，另有回贈$53)
                     取消政策：3日前免費取消


為左俾大家睇真d，check埋：


萬福價錢：$1120 (要等覆，只收現金)
                    取消政策：無得取消


priceline： $1280 (即時確認) 
                    $1109 (要等覆)
取消政策：4日前取消，收港幣$100手續費


論flexibility，官網係最高，因為可以8日前免費取消。論抵，就一定係agoda (DBS Black Card promotion)!


雖則有94折，但又唔代表所有酒店都抵左喎。正如我所講，好多時，最平嘅反而係酒店官網。


就以港人熱愛嘅新驛台北車站2館為例，
deluxe double，8月25日星期六 check-in

未折前價錢$902 (已計稅)

折後價：$852

agoda：$852 (已折，即時確認，回贈$34，3天前取消收15美元，3天內取消收1晚房價)

官網：$664 (即時確認，台幣2560，14天前免費取消)

官網平好多嘅實證

其實，好多人去旅行都係買package，但其實package往往唔係最抵，好多$1xxx起全部都係幻覺，搞完一大輪你會發現佢收你每個人嘅服務費，仲有星期五、六入住又有附加費，旺季又有機票附加費。萬一有d咩事上嚟又唔可以改任何野。


我深明大家唔想花時間去自己訂同check，但其實，online 訂機票，酒店就check官網，再check agoda，基本上唔需要check其他地方~~ 計落用嘅時間咪又差唔多？但好處就係即時確認唔駛等覆，同埋有比較 flexible嘅cancellation policy，同埋價錢好清楚。


暑假就到，係時候籌備一下旅行喇~~~ 


上機前，去機場page one，出示DBS Black Card，就可以免費攞走一本 $12嘅雜誌（u-magazine啦）!!!!