其實，我真係好鐘意大埔。
我出世幾個月就住大埔，直至中五先至搬去第區。
我喺度讀幼稚園、小學、中學，渡過左我人生最無聊嘅10幾年。我成日話，人生最奢侈嘅時候就係讀小學、中學嘅時候，因為果時唔知點解你會有無限嘅時間同精力，做好多好無聊嘅事。人生除左頭果十幾年同尾果十幾年之外，有幾可可以咁無聊？
好似我咁，幼稚園嘅時候就住喺吐露港旁邊嘅工業邨旁邊，日日無所事事，同班細路一齊捉金龜放入個盒度，之後又放生。傻下傻下咁無目的無定向跑來跑去，玩「伏呢呢」、「狐狸先生幾多點」。
小學放學返屋企睇430穿梭機，同隔離屋啲細路扮開超級市場、扮結婚、拍閃咭、偷偷落街買零食。果時我哋唔駛學野唔駛報學校都寫CV (我學琴只為學琴，學跳舞只為學跳舞，就係咁簡單)，唔駛上playgroup，唔駛補習，不知幾快活。我間小學嘅校長好鐘意填詞，不過佢自己可能無發現，填詞從來都只係佢興趣，唔係佢專長。成首歌無一個字係啱音。佢成日攞我哋呢班細路做白老鼠，校歌又係佢、校監榮獲MBE首歌又係佢。記得有一年我哋舞蹈團要同大埔兒童合唱團上大陸表演，校長就作左首「我的家園大埔」，歌頌大埔嘅美好。果時我哋日日綵排，首歌入晒腦，到依家我都仲識唱。
校歌第一句，就係「山長水遠，大埔景色多壯麗」。我可能因此被洗腦，細細個開始就好鐘意大埔，覺得呢度好靚。有八仙嶺，有吐露港，有好多好野食，有好街坊、好朋友。
中學嘅時候，聽四大天王、追偶像、睇左N咁多本小說漫畫，日日放學唔想番屋企，就同同學行勻成個大埔。我學校好近大埔火車站，我通常放學會先去火車站上蓋嘅新達廣場食個TEA，然後再經大埔墟，行去大埔中心，有時會去同學屋企玩，之後再行番去火車站。放假去同學屋企打牌、打機、同屋企人去大尾督燒野食，去漁排捉魚、去林村許願樹、食盤菜、有時去行山，去吐露港踩單車(果陣時未有隔音屏、科學園同樓盤，成條海岸線都係屬於市民架)。每年中秋節，同同學約埋去大埔海濱公園煲蠟。
以前我以為係人都識踩單車，因為大埔人個個都識嘛，點知原來唔係。後來我仲發現，原來有啲香港島同九龍嘅學校秋季旅行會去大尾督架。我仲以為所有喺大尾督燒野食嘅人都係大埔人。
因為，我去呢啲地方，真係好似踢拖落樓下7仔買支汽水咁嘅心情架咋，呢度我主場嘛。
喺大埔成長，所以真係街坊處處，行到邊都遇到識嘅人。好似依家好多報導嘅街市大樓熟食區，大部分檔口我都係由細食到大，由以前搭出來嘅臨時街市(臨時左好多年)，$3一包排骨飯，食到依家$14。茶水檔夫婦個女同我同年，老闆仔女結婚、抱孫擺酒、到老闆葬禮，我地都係座上客。所有人，都係大埔街坊。
就算無住大埔咁多年，我都覺得，大埔是我家。
雖然校長嘅「我的家園大埔」完全唔啱音，但係單以文字來講其實唔錯架，好真實，好浪漫：
當我漫步林村 山谷風光美妙
綠蔭樹影婆娑 山溪流水淙淙
野花清又芬芳 閃耀金光一片
多麼美好我的家園
大陽東方升起 金光照耀天際
海面波光閃閃 漁舟帆影點點
高樓大廈林立 廣福大元富善
多麼美好我的家園
(仲有二部輪唱添)
美好的家園大埔 (美好的家園，溫暖的家園))
由林村山谷到八仙嶺巔 (由林村山谷 直到八仙嶺巔)
環繞 吐露海港
我知道多麼美好 我的家園
就係咁，由小學開始，我就覺得大埔是我家。到依家，我都仲想有朝一日搬返去住。
最近睇報紙先知，原來龍尾要起人工海灘。
「曾德成指大埔區議會已就事件討論70多次，項目也通過環評等法定程序，為北區、大埔及沙田約120萬名居民建一個人工泳灘是「有長期訴求」，至於烏溪沙自然海岸，政府不考慮理由是「沙田區議會未討論過」。政府指龍尾有三種具保育價值的魚，包括星點多紀魨、賴氏綠巢鰕虎魚、雙斑舌鰕虎魚值得保留，但不包括管海馬，工程前會將生物遷移至汀角東等地區，減低生態影響。」
政府話人工海灘係有「切實需要」，其實有咩「切實需要」呢？「切實需要」唔係講緊一啲個社區大部分人都需要或者無左真係好唔方便嘅野咩？例如公路、醫院、街市、運動場所、圖書館？幾時連沙灘都係有「切實需要」嘅野？無左沙灘唔通我地生活唔到？上天無俾一個自然沙灘呢個區，咁咪去有海灘既地方囉，香港有幾大？唔通每個區我地都要造一個出來？
唉，枉我自詡為大埔人，對呢件事竟然一啲都唔知？政府已經通過所有既定程序，喺區議會亦有討論，是否再一次證明，議會已無法切實反映市民意見？自己無出一分力去參與，實在內疚，依家似乎無得返轉頭，真係好心痛。我地真係無得返轉頭嗎？如果係真，咁我地之後要點做先可以保衞到呢個美好嘅家園？
