夜半腸粉 - 堂記

香港識食之人對堂記絕不陌生。

全店賣的只有兩味，腸粉和粥。

而且，每天晚上七點開到兩點半。星期三、日休息。

你話佢地串唔串？

不過，佢地又真係串得起。

腸粉即叫即製，皮厚度適中，晶瑩剔透有咬口，

內餡新鮮又特別，在叉燒牛肉鮮蝦之外，

仲有豬膶燒鵝等等，全部都好有水準。

豉油和油的味道和份量恰到好處，畫龍點睛。

一個字：正！

至於菜干粥等等都是陪襯品

老闆以此拋磚引玉，因為店內寫到明，點粥的客人的腸粉會上得更快(所謂快都要半個小時)。

粥的品質是合格的，不用擔心。

這家店，晚晚座無虛席，很多人專程駕車來買，

價錢唔貴，十幾蚊就有一碟腸粉，

係宵夜的好去處。

全港大大小小的飲食媒體，甚至日本的，都已經報導過了。

店內人手少，招呼可以話係零。

佐敦渡船街一帶係一個食既小天地，有時間要去探索一下。

堂記腸粉專門店

佐敦渡船角文匯街26號文景樓地下C號舖

博客重開

我份人一向比較悲觀，覺得人之所以投胎為人，一定係前世做左好多衰野，不然就做左貓啦。

咁既然上天要你做人，都冇計，惟有活得開心d。可能有人會問，今世駛唔駛做番好多好事，等下世可以做貓？咁又唔駛，你今世都唔知你上世發生咩事，咁你下世都唔會知你今世發生咩事架啦。所以，做好事唔駛刻意，發自內心就得。

雖然我覺得人類大部分時間都係有破壞冇建設，但我地都有美好o既一面o既。好多時我都會為人類o既一o的表現感動，例如無私o既愛同奉獻、彈得一手好結他、寫出一首好曲好詞(而且讓我聽懂了)、煮出天下間o既美食、發明iPhone同淘寶、拍出絕世既好相片、好似巴塞咁踢出唔似係人踢o既波等等。所以，人生絕對唔係得個灰o既。

正所謂「既來之，則安之」。既然都出左世，如無意外都要活多幾十年 (唔好命o既可能長命百歲)，咁我o地既目標，當然係要活得好、活得精彩、活得高興啦。

本blog o既目的，就係記錄同分享下我o既敗壞過程啦。不過，我雖然鐘意寫作，但我同時亦好鐘意hea，可能呢期好搏盡咁寫，下期又撻左唔想寫。大家唔好見怪。

開番呢個荒廢已久o既blog，要多謝一個人(唔係Paco)，係我好姊妹nicole。我見佢寫得咁過癮，又想湊下熱鬧。

let us pray: 希望寫完呢篇仲會有第二篇。