要幾荒謬有幾荒謬

早兩日o係明報睇到有單新聞，講有個香港「著名」婚紗攝影師，o係摩星嶺炮台(法定二級古蹟)幫一對新人影相時，為左營造熊熊烈火o既效果，就o係現場「生火」，然後一對新人企o係火堆前影相。呢件事揚左之後，惹來好多網民批評，話佢冇公德等等。

相片來源：明報

警方現正調查此事，所以我地暫時唔可以100%肯定個攝影師或者任何人係有「生火」，還是只係photoshop加上去。不過，事件已經惹起好多人關注。

個人認為，假如真係有人o係公眾地方「生火」，面積仲要唔細，無論果個地方係唔係古蹟，無論係為左乜原因，只要係會對附近環境構成影響，都絕對唔可以o係冇得到許可之下進行。我覺得呢d係common sense，唔係咩高深知識，亦唔需要受過咩教育至會識。如果你認為冇問題，即係等同於認為任何人都可以o係公眾地方，為左任何目的而「生火」。

如果真係隊crew諗出來，或者係對新人o既要求，恕我狠d講句(我好少咁狠咁批評人)，提出要求又有人肯做，又或者為左滿足客人要求而諗出呢條「橋」既，除左無腦同白痴，我實在諗唔到有咩其他形容詞。希望佢地會得到法律o既制裁，同埋真係明白自己做緊o既野係唔啱。

「生火」後。資料來源：網上討論區

點解我一路都用「生火」而唔用「縱火」、「放火」，因為我發覺，荒謬的人做出荒謬的事，竟然有比佢更荒謬o既人支持佢。o係fb見到有個friend share事涉攝影師o既photo blog 留言，有人批評佢 (我覺得正常不過，而且措詞都算平和)，但更多o既唔知係佢d friends 還是佢d fans 還是佢d行家 (自稱從事藝術創作o既人)，不停地為佢揾藉口，反攻擊批評o既人。當中包括，有人話如果攝影師真係放火唔啱，反而比人批評話「你又唔o係現場，點知人地係唔係放火」，所以我用「生火」，中立d；又有人話，大家o既批評係「扼殺藝術創意」(變相等同認為藝術創意可凌駕一切)；又有人話，人地如果做錯事，自然有警察會做野，有官會判，其他人無資格批評 (共產黨思維)；又有人話，好欣賞攝影師o既熱誠同埋佢o既作品 (所以佢做既野就係無錯？)；仲有人講，之前有邊d邊d新聞咪仲嚴重，又唔見有人咁關心？

如果你同意上述觀點，歡迎回應討論，我真係好有興趣深入了解下。