唔知大家係咪同我一樣，已經好多次，按摩師按我背脊時，話我D筋扯到超級崩緊，實到按唔到落去。試過有人問我，嘩小姐，你做咩工架？點解可以攰得咁緊要？第一次聽我以為係個按摩師想sell 我買套票，因為我試過0係大陸做spa既時候個therapist話我某部位有勁多硬塊，叫我join佢地個package推散佢 (傻啦，我從來唔信咩通淋巴、爆脂呢d野，咁容易推散我d硬塊，咁我d醫生朋友讀咁多年書為乜？不如索性開間推拿，揾幾個姐姐仔幫人推腫瘤、推硬塊算啦。)
結果我返香港睇醫生照超聲波，一d事都冇。最後比佢推既部位痛左成個禮拜，真係撞鬼。
言歸正傳，查實我自己係唔覺自己有咁攰，我只係覺得有D酸痛，不過去到被人按落個穴位至知原來真係超級痛，而且事後都真係會痛番三兩日，加上實在太多次有按摩師話我背脊崩緊得好厲害，問我做邊行，搞到我開始有d唔好意思再話我係做文職 (經過三番四次被人問之後，我得出一個結論，就係我應該答「我做地盤架」，等佢地可以話「哦，唔怪之得啦！」成個conversation至可完美落幕)。依家我通常都係笑兩聲，然後話「係呀係呀，唔知點解」就算。
anyway，我曾經有認真思考過到底點解我會咁，包括懷疑係我張床褥既問題，因為小女子自懂性以來所「目訓」既床褥就係好似人地軍訓果d木板床咁硬，主要原因係家父覺得市面上果d床褥，尤其是「目訓」落好似好舒服果d，全部對腰骨都唔好。睇到呢度，大家唔好想像到我間房好似好淒涼咁得張硬如木板既床褥 (仲要加張鐵架床，家徒四壁，床邊有把爛熔熔又佈滿塵既風扇發出達達達達聲)，其實多年來我已經「目訓」慣左仲覺得幾舒服；我亦有特別注意我既坐姿，尤其是返工既時候，不時走動下；另外就係檢討下自己個人平時係咪太過精神緊張導致崩緊 (呢樣最匪夷所思，因為如果係真既話，我諗我唔係精神緊張，而係精神分裂，因為平時我既生活都真係幾唔緊張，可能係夜晚有另一個我走左去地盤開工？(但我冇出過糧喎))
直至依家，我都未揾到真正既原因。惟有keep住去按摩同做spa紓緩下。
但係，要揾間好既按摩真係一d都唔易。大陸果d試過無數次，佢地無錯係稍為平少少，但係我覺得佢地係頂多都只可以稱為「o禁肉」，求其o禁你幾下毫無技巧，叫佢大力d佢就當正你係殺父仇人一樣幫你「鏈肉」，所以我上大陸去所謂既按摩都係當比d錢去坐下休息下，同埋有人幫你郁下你d肉咁。如果大家有好介紹，請立即話我知！
近年我鐘意o係香港按，寧願比貴d，起碼我feel到成效。我去開都係果一兩間，唔講得上係好正 (本人試過最正既按摩係o係柬埔寨暹粒，永世難忘)，所以如果大家知道點度有好既師傅，一定一定要通知聲。
至於spa，試過香港、大陸、泰國、台灣、馬來西亞好多間，最正就係泰國既divana d，又唔係o係香港。
好既按摩師同好男人一樣，都係咁難揾，最慘就係，呢樣野冇得自救，永遠都要靠人。
No comments:
Post a Comment