做人不可太自大

又嚟。年幾兩年前上水有區議員「成功爭取」木棉花絮飄落之前將木棉花剪晒，以保護果d本身有敏感症嘅市民，今日新聞報導粉嶺又有人投訴木棉花絮擾民。

到底呢個係咩世界？點解依家人嘅價值觀會扭曲成咁？你只係世界嘅一部份，唔係世界嘅全部。你嘅存在係要學習點樣同其他人或者其他事物共存，而唔係因為人地對你構成不便，你就要趕絕人地，連生路都唔俾人行。

果d覺得木棉花好靚，唔介意佢年年開花，但係又唔想佢開完花d花絮會周圍飄，於是叫人將人地d花剪晒落嚟嘅人，其實就等於貪人幾靚就當人地係花瓶，年年搞大人個肚之後，年年叫人去落仔一樣。

至於果d覺得木棉花絮令敏感症或者哮喘加劇，所以直情要斬晒d木棉花樹嘅人，就等同覺得任何人如果有傷風感冒等傳染病，仲有可能傳染埋比佢，就要立即判處死刑一樣。呢個比喻其實唔夠貼切，對木棉花都唔公平，因為木棉花根本連傷風感冒都冇。先搞清楚點解你會有敏感症或者哮喘？唔係因為木棉花絮天生係致敏源，亦唔係因為木棉花存在而導致你有哮喘，而係因為你自己身體弱、免疫能力弱，所以木棉花絮先至會成為你嘅致敏源或者引發哮喘。問題係出於你本身，而唔係木棉花。所以，其實你最應該剷除嘅，係你自己。

呢個世界上，對環境造成最大滋擾嘅，一定係人類。你砍伐樹木，令無數動物無家可歸，破壞生態鏈。木棉花絮唔准飄、夏天蟬唔准叫(因為嘈親你訓覺)、雀唔准大便(因為整污槽d地方又傳播病毒)，d樹木雀鳥有冇出過聲？有冇得話覺得你人類太多，所以要求你地絕育？又或者投訴人類迫遷、強拍、扼殺動物基本權利，然後要求剷除人類？

轉個頭你搞到空氣污染影響健康，又話樹木好，樹木可以改善空氣質素，要求做多d綠化。到你良心發現，開始懷念鳥叫蟬鳴，就整個公園將所有你想見到嘅野放晒入去，等你得閒嘅時候帶埋一家大細去睇，同d仔女講「嗱，呢隻就係蟬囉，佢地夏天會叫架」、「果隻就係雀，佢地喺天空度飛架~~~」，叫佢地要愛護大自然。但另一邊廂如果蟬喺你屋企附近叫，雀大便痾中你晾衫架件衫，你就恨不得「一隻手指捽死佢」。

我以前住嘅地方，回家有一條必經嘅路，路上有五六棵木棉，每年開花，每年有花絮飄落，我覺得花絮係人間美景。我有鼻敏感，但真係從來冇諗過要剷除d木棉嚟避免自己敏感。我讀既中學有個後山，係法定保護區，好多候鳥棲息，好多白鷺飛來飛去。每朝我地全校喺後山旁邊嘅操場集合，d雀仔喺頭頂飛過，中頭獎、踩地雷，並不出奇，我都中過兩次。每逢繁殖季節，後山we wa鬼叫，傳到去課室。七年裡，我從來無聽過有同學(或者同學嘅父母)投訴過。

我曾經以為一切都係理所當然，依家我發覺我要為我身邊嘅人都係正常人感到慶幸。