元朗屏山華嫂菠蘿飽

招牌菠蘿飽，內有半熟煎蛋、蕃茄

非常唔覺眼既門口

元朗屏山有檔連招牌都冇既茶餐廳，查實大家都叫佢做華嫂餐廳。以前只係士多仔，做下鄧氏既圍村生意，點知愈做愈大，搞到依家好多外人(包括我)都走嚟食，有時仲要大排長龍。門口非常唔覺眼，但細心d留意其實唔難揾，就係鄧氏宗祠附近有個可以話係全港最靚既公廁既對面。

呢間士多仔最出名就係招牌菠蘿飽。個飽熱辣辣，裡面夾有新鮮蕃茄同埋會流出蛋黃汁既半熟蛋，全部係即叫即做，唔會整定，所以要預左等候時間唔短。

除左招牌之外，仲可以揀豬扒菠蘿包、芝士蛋牛飽，全部都好有水準。

另外，睇個樣都覺得好食既蕃茄湯麵、鮮牛、鮮豬肝或者鮮魚球麵。我來係因為我既agent介紹，佢話，呢度既蕃茄湯係即叫即煮，食來好鮮，又而用料又足，湯底好濃。但因為成間舖仔得一個爐，好多人等到唔耐煩，所以奉勸各位冇時間冇耐性之人唔好叫。另一個tactic係，趁佢每日做完第一轉大約11點，或者第二轉12點半，(留意佢地1-2pm中午時間係唔做生意，因為成間舖關門大家伙計要食午飯)，人少d既時間叫，會比較快。

蛋牛芝士堡

做得一間茶檔，奶茶當然要好飲，如果唔係就稱唔上係一間茶檔。我呢個奶茶精第一時間當然係叫杯奶茶啦。不過今次冇叫熱，只係叫左冇冰既濃滑奶茶，果然係幾好飲，合格。

又香又濃又滑既奶茶

華嫂每日開8至5，星期日唔開。大家如果想試，可以考慮下元朗天水圍一日遊。有幾條路線可以推介比大家，首先就係華嫂位處既屏山文物徑，成條徑唔長，好啱一家大細，睇下鄧氏宗祠仲埋認識圍村文化。呢度仲保留左好多舊式建築，仲有一個屏山博物館，整得好靚，企o係上面可以睇到元朗平原 (小學讀書成日話元朗係全港最大既平原，我諗好多人都係得個死記，住o係城市既根本唔知咩叫平原，屏風樓佢地或者識。去到外國見到人地d平原淨係嘩嘩聲，人地問番你香港有冇平原，可以就咁一句冇就回應左。其實係好應該親眼睇下，雖然依家肯定已經唔再係會令人驚嘆，但至少你知道，香港係hilly relief，但都有好大的一塊平地)。

朝早入來行完文物徑，再去華嫂食個lunch，之後再去濕地公園，或者米埔、南生圍，想游水可以去黃金海岸，再唔係入錦田紅磚屋行下街。

豬扒菠蘿飽

以上地方要泊車好容易。如果唔想揸車，可以考慮先入左元朗，再參加生態單車團，大概100元一位，包晒單車頭盔，仲有專業導遊，路線有幾條，可以由元朗經天水圍踩去流浮山睇日落。

夜晚食飯有好多好多選擇，一家大細或者三五知己可以去三聖村或流浮山食海鮮，入元朗市食到你唔食，想食好d可以去紅磚屋食吳師傳私房菜，或者附近既金壘餐廳。

想遊下車河兼二人世界可以沿住林錦公路一路奔馳到林村食私房法國菜荷曄庭，或者學古天樂帶高圓圓去旦王花食泰菜。不過，唔好話我唔提你，高圓圓最後都揀左吳彥祖，哈哈。(順帶一提：單身男女係我近兩年睇過最爛既片，大家千祈唔好睇)。