打劫和拉布

阿叔好野!!! 

早兩日有單新聞，講一個廿零歲嘅後生仔半夜持刀走去打劫便利店，遇著處變不驚嘅店員阿叔，唔單止成功由打劫500蚊講到100蚊，講掂數後自掏荷包打發左個後生仔(要做幾個鐘先先有100蚊架!!)，仲好言相向，勸個後生仔唔去打劫去揾野做。

雖然個後生仔打劫唔成，實比佢d friend笑死，但係，後生仔，你壞唔晒架，早d行返正途啦。阿伯64歲人都仲去便利店做夜更，你有手有腳有氣有力有青春，唔應該咁樣糟蹋自己。

為左幾百蚊走去犯法，真係好天真好傻架，你點對得住你自己、你父母、你老婆仔女？

蘋果日報180512

其實賺錢有好多方法，只要你上多d討論區，就會發現好多工好等人用，而且人工高又唔困身仲包食添。示威幾個鐘就已經有幾百蚊架喇。

如果你話，你份人好有原則，唔會出賣自己嚟換取嗟來之食，咁你直情係一個有理想、有抱負嘅有為青年，更加唔應該去打劫，揾份正正當當嘅職業，用自己能力去賺錢啦。

如果你話，你打劫都係迫不得已，因為實在無錢係等飯開，但你又唔知拉布、替補機制係乜，唔緊要架，你有冇睇新聞？有個反拉布既阿叔話自己反對替補機制，答錯晒都得啦，咁又多$100。如果你唔怕醜，攞埋大聲公嗌口號、再拋頭露面舉牌、好似阿叔咁接受訪問(講得有point唔知有無錢加!! haha) 好易一日賺成千，何必要以身試法呢？

如果你話，你份人最憎某某黨，走去反拉布即係出賣良心，都唔緊要，有一樣野叫做「打著紅旗反紅旗」，你本著咁嘅心態去賺果$300，係唔係好過d呢？至多唔好接受訪問唔攞大聲公同舉牌囉。學某議員話齋，「食窮某某黨，票投某某黨」丫嘛。有理無理，$300袋袋平安，之後你支持邊個，有邊個知？憑良心去投票，你其實冇出賣自己架，你知道自己做緊乜就得架喇。

如果你話，你係真心反拉布，真心支持替補機制，你都唔差得晒架，至少你有關心社會，肯去思考問題，再得出自己既立場。民主社會，大家有唔同意見係必然嘅，你咁後生就已經有獨立思考，唔好去打劫喇，去表達你嘅意見，用你嘅理據去說服其他人，去體現同捍衛你嘅自由啦。