崩潰數學題

前日發生左一件令我很崩潰的事。

話說我放工去公司樓下嘅中銀櫃員機攞錢，螢幕顯示此機只提供$500及$100面鈔。我輸入左密碼之後，提款$20000。(按：我之前已經試過好幾次成功提取$20000)

點知螢幕彈出「此櫃員機只提供$500及$100面鈔。請輸入$100的倍數的面額。」

先唔質疑點解櫃員機提供$500同$100面鈔，但只可以選擇$100的倍數(唯一我諗到嘅解釋係因為500嘅倍數一定係100嘅倍數。嘩，中銀對客戶嘅要求真係高！好在我都諗到…哈哈)。

喂，20000唔係100嘅倍數咩？

我心諗，可能頭先唔小心入錯左數目。所以，我再輸入多次$20000。(我都真係有心算下20000係100嘅倍數架(100x200 = 20000!! Bingo!!)，撞鬼。

「此櫃員機只提供$500及$100面鈔。請輸入$100的倍數的面額。」

吓？又嚟？

由於我係數學白癡，你知啦，一講到數學我就有如鵪鶉架啦嘛，雖則我係百分之百肯定20000係100嘅倍數，我本能反應都攞左部iPhone出來，用計算機計一計 (20000/100 = 200!!) Yeah!! 幾驚佢話 = 200.333333333!!。

數明明係計啱左，但櫃員機似乎又話我錯喎，搞到我好為難。

為免自己記錯戶口其實唔夠錢，我重新入過張咭check一下戶口結餘，夠錢喎！

我再諗深一層，因為櫃員機只提供$500同$100面鈔，如果我攞$20000，佢唔可以一次過出咁多張錢俾我(喂，但唔該你講清楚原因，唔好考我倍數又話我錯吖，我嘅數學自信心已經低到受唔起更多打擊架喇)。假設櫃員機一次可以出30張錢(純粹係假設，我唔知係唔係真。因為存錢易一次可以入30張錢，如此類推)，依家部機只提供$500同$100，咁最多可以出30張$500，即係$15000。(係咪有少少似以前果d數學題：櫃員機每次可出30張紙幣，而且只得$500同$100面鈔。)

1.      小明去攞錢，請問佢最多可以攞到幾多錢？ 或者

2.      媽媽叫小明去攞錢，媽媽話佢想要盡攞，但要20張$100，請問小明最終會攞到幾多錢？

言歸正傳。所以，第三次我輸入左「$15000」(係100嘅倍數!!)。

「此櫃員機只提供$500及$100面鈔。請輸入$100的倍數的面額。」

吓？又錯？！

到呢一刻，坦白講，我開始有少少崩潰，我覺得自己好似精神病人，明明自己覺得啱但全世界都話你錯。天啊，我係咪發緊夢？

最後打救左我嘅並唔係咩常理或者禮服幪面俠，亦唔係客戶服務員或者中銀電話熱線，而係中銀喺我心目中嘅形象：差！

崩潰中嘅我開始醒起，中銀呢d服務質素向來都甚差嘅銀行，係唔可以用常理去面對佢，試下求其入一個細面額d嘅數，可能就會得。試埋今次都仲唔得就走去匯豐啦。

於是，我輸入左$10000。。。。。。

得左！！！！唔好問點解，唔好深究$10000、$15000同$20000係唔係$100嘅倍數。不要問，只要錢！