瘋狂世界

日日打開報紙、睇電視新聞，都有好多令人發火又勁荒謬既事發生。我成日諗，可恨我唔係果d對世事冷感既人，又要睇，又要知，又要忟，到頭來對自己生活既地方開始絕望。

我唔知係以前細個唔識諗，所以唔覺得個社會咁worse，還是個社會真係比以前worse左，近年我覺得香港真係每下愈況。荒謬的事，反智的邏輯，囂張跋扈的所謂領袖，受侵蝕被剝削的自由；貧富懸殊，利益傾斜，沒有產業，只有炒炒賣賣的數字遊戲，社會愈來愈分化，滲透令本土價值逐漸消失；政治走向單一化，「反對派」政黨唔夠人玩，一個一個被技術性擊倒，慢慢慢慢勢力消退。最可悲既係，睇唔到會有改善或者可以反抗既一日。在乎既人係少數；唔在乎既人繼續唔在乎；既得利益者就繼續悍衞自己利益；冇利益可得者怨氣加深，又無能為力。

我地到底有咩出路？

我最討厭的工序：蠟線

蠟線

蠟線絕對係我最討厭既整皮革工序。以前學皮，老師冇要求我地要自己蠟線，一開始已經比左D有蠟既線我地，又或者唔會BOTHER去睇我地有冇蠟線。

自從跟左黃SIR學皮之後，蠟線成為必要既工序。阿SIR話，線係唔可以唔蠟，因為冇經上蠟既線係會好容易散，而且經唔起時間既考驗，整出來既PRODUCT長遠來講係唔會靚既。

我都知阿SIR好有道理，但係蠟線實在係非常唔ENJOYABLE。阿SIR話，佢好鐘意蠟線，唔明點解學生們都唔鐘意做呢樣野，我心諗，所以你係老師我地係學生LOR.... HAHA

雖然唔鐘意，但係阿SIR指明必須要做，我都惟有乖乖地蠟。我都知，成件事都係為左我好，所以，我冇GROUND去反抗。

諗深一層，人生就何嘗唔係咁？冇可能樣樣野你都鐘意做，就算唔鐘意都係要做。但唔鐘意做既野，往往只係一個過程，硬食左之後，睇番轉頭就會覺得自己有得著，付出係值得既。呢樣野我大學住HALL時已經體會過，基本上頭兩年都係不斷地鬧，怨氣勁大，成日都諗住QUIT。到後來好神奇地，我真係鐘意左我間宿舍，好多野睇番轉頭，覺得係一個過程，令到我成長，令到我學識點解用多角度去理解一件事。

今晚補堂同幾位素未謀面既同學上堂，佢地興一邊飲酒食HAM & CHEESE，一邊整皮，好RELAX。我飲左兩杯白酒，落堂後十萬個眼訓，有少少醉意，o係巴士度完全昏迷。

造物者之無盡藏

記唔記得蘇東坡既 《前．後赤壁賦》？

每次去西貢，睇到呢度既景色，感覺都好似發夢一樣，覺得呢度唔似係香港，而係馬爾代夫，甚至係塞舌爾。星期日去左大浪灣，我訓o係極幼細既沙上，望住眼前一片藍天白雲，同埋清澈既海水，諗既就係前赤壁賦既呢一段：

「客亦知夫水與月乎？逝者如斯，而未嘗往也；盈虛者如彼，而卒莫消長也，蓋將自其變者而觀之，則天地曾不能以一瞬；自其不變者而觀之，則物與我皆無盡也。而又何羨乎？且夫天地之間，物各有主。苟非吾之所有，雖一毫而莫取。惟江上之清風，與山間之明月；耳得之而為聲，目遇之而成色。取之無禁，用之不竭。是造物者之無盡藏也，而吾與子之所共適。」

每次我睇見美景，感受到大自然既偉大，我都會諗起前赤壁賦。人未必生而平等，但係大自然比我地既，係每一個人都可以享有。

好似好老土，但我覺得香港有一處咁美好既地方，我地真係要好好保護佢。

織織復織織...

British Old Style Coin Case

織織復織織，一條直線都好鬼難織。

最近學緊整散子包。睇落好似好易，做落明顯唔係。

整皮革有一樣好重要既元素，就係線步。由於用既線通常同塊皮既顏色有一定既contrast，所以條線往往係最覺眼。而線步係有一定既pattern，每一下穿線，係咁易錯左手勢，成條線就已經唔同左。只要有一步錯左，一望就會見到。一條直線，有一步既方向唔同左，已經差好遠。

今次整呢個散子包，用既係機織出來又上左蠟既線，同學之前已經warn左我，話呢隻線穿起上嚟好鬼煩，成日打「戟」，而且好容易勾到d線。平時我地用既手縫線，其實係由3-4條幼線捲成，所以比較容易處理，打戟都比較容易拆，但機織出來既線本身既pattern已經好複雜，極幼細，一個唔覺意，支針就會勾到d線仔，墮入深淵，萬劫不復。

只係一條直線，我既線步已經錯過三次，要拆過再來；間唔中又勾到線打晒戟，解結解到傻。所以話，手作真係耐性既考驗。一直以來人地問我覺得自己有咩缺點，我都會話冇耐性，但係入左大學之後，我竟然o係班friend當中被譽為好有耐性既一個，haha，真係唔知係我進步左定係一山還有一山高。

除左耐性，另一樣好重要既元素，就係要打好基礎，絕不可以急於求成。好似穿線，有幾個基本步，如果肯花功夫去鑽研，去熟習，本身既底子打得好，呢一世穿線都會effective好多。

其實，手作如人生。

另一樣手作帶俾你既，就係欣賞其他人既心。人好多時都有一個陋習，包括我自己都會，無論係工作上、生活上，都會不自覺地覺得自己做既野就好難，人地做既野就好易。事實上，有好多野睇落好容易，原來當你做過之後，就會發現一D都唔易。同一道理，自己做一樣野，永遠有無限既justifications，但當人地做同一樣野，就no excuse &  no mitigating factor!

如果你對任何手作有興趣，不仿參加下d興趣班，只要肯花時間和心思，你得到既一定唔只係件手作咁簡單。

to live or to exist?

night view from my home

過去兩星期實在係好忙，因為我有一星期時間將要去上堂，唔會返office。到我返到office，老闆又放假。所以，我每日一返到公司就要同時間競賽，目標係0係放工前完成當日要做既野，希望可以o係我上堂之前，搞掂晒我想做晒既野。結果，我日日都OT，有時去到6:30pm，有時7:30pm，都唔係100%達到晒我既目標 (我強調，OT完全係我自願，老闆冇要求，佢亦唔覺得我有野要趕。我做左咁耐，都真係冇試過連續幾日要OT)。或者係我set得個目標太高，太貪心。

我知我所謂既忙，比起好多人都仲係差好遠。因為對我來講，OT絕對係唔理想。基本上我係接受唔到一份工經常要我OT，佔據左我既私人時間，或者令我掌握唔到我自己既生活，好似阿媽打電話問我今晚番唔番到屋企食飯，幾多點返到，如果我去到差唔多放工既時候依然係比唔到一個明確既答案 (例如因為唔知老闆幾點走，唔知老闆會唔會忽然比d野我做，唔知會唔會公司有急野要即刻完成，或者因為枱頭實在有太多野都唔知幾時先做得完)，對我來講已經係唔可以接受。

有人話，嘩，依家OT基本上已經係norm啦，7-8pm收工好正常。6:30pm收工？除非你份工真係好得閒，唔係你真係與時代脫節。我覺得呢個logic好奇怪，如果你公司既office hour 係 6:00pm收工，點解 7-8pm收工會係好正常？我知道現實生活裡面好多人可能仲遲d放工，對長期OT已經唔再有感覺，但係唔代表你要將唔合理既野normalise。如果你問心都係prefer可以準時放工，即使你實際上係要日日OT，因為你唔OT實在做唔晒，都請你切記，唔好覺得遲放工先至係與時並進。因為久而久之，你會不知不覺成為被虐狂。套用好多人講過既例子，有個人日日打你一巴，忽然有一日冇打，你就周身唔聚財，仲問人點解唔打你。又或者佢今個月打少你幾日，下個月只係打左你兩星期，你就覺得佢其實係個好人。

一畢業做記者既時候，過既係斷六親既生活，不過當時既我冇所謂，因為一我後生，二我希望見識多d，而做記者係幫到我，三因為公司以致行家過既都係類似既生活，大家對得多，捱又一齊捱，呻又一齊呻，一邊捱一邊呻，有一班人同你share你既感受，四係做記者雖然工時長，但時間實在係好快過。

不過，人老左，追求既野有d唔同。work-life balance對我愈來愈重要，而我既life絕對唔係work (有d人既life係等如work，我覺得冇問題，最緊要係佢enjoy)。

"To live is the rarest thing in the world, most people exist.  That is all."  - Oscar Wilde

記得第一次睇到呢一句說話，我個心寒一寒，當時我諗，我係exist定係live？每一個人對exist同live有唔同既定義，所以每個人過既方式唔同。我唔係話要否決只係exist既人，我只係想提下大家，如果你心裡面仲未有答案，請你諗下，以你自己既標準，你想你既生命係live定exist？咁依家係live定exist？如果你做緊既唔係你所想要既，make some changes!

走難

上星期六，返左廣州飲我舅公大壽果餐。

屋企同內地親戚關係好好，所以我絕對係好樂意同舅公慶祝生日。

不過，唔知係咪人老左定係咩原因，我發覺我真係愈來愈怕返大陸。

去旅行去過唔少地方，有比大陸發達的，亦有比大陸窮的。但係，只有大陸至會令我有種「走難」既感覺。

無論去到邊，人都係咁多，過關、行街、搭車、食野、上廁所，永遠都係擁擁擠擠、急急趕趕的，從來都唔會有從容不迫既感覺。最慘就係，到處都係唔守規矩既人，打尖係norm。試過有次我等公車去從化，15分鐘一班車，好好地排隊，但係後面d人不斷打我尖，不斷推我。我心諗，15分鐘一班車，你驚冇得上咩，遲15分鐘係咪會死呢？開初我堅持排隊，但結果我眼白白睇住4班車就咁走左 (原本跟次序既話我應該上到第1班車)。最後，我好唔情願地加入死迫爛迫死推爛推既行列，好似打仗一樣，先至上到第5班車。

當錯既野o係一個地方係正常既時候，你做啱既野係冇用既，最後你都係要成為錯既一份子至可以生存。情況就如同你一個正常人比人捉左入青山長住一樣。

人多之餘，仲要加上無限既不安全感。呢頭擔心個袋會比人搶，果頭又驚手袋無拉鏈會比人偷野，入廁所又會諗唔知轉個頭行出來會唔會已經冇左個肝，行近d馬路又怕忽然有人開架車捉左你。

有時，我真係唔明，點解我身為中國人，返到「自己」國家，反而先至係最唔安樂最唔自在，要處處提防其他中國人。

以前就話大陸d野平，我搏一"鋪"冇事抵好多，依家我發覺大陸d野一d都唔平，分分鐘貴過香港。既然係咁，除左探親，我仲有咩返大陸既理由？

她的coffee matching...

自從上次寫左關於我朋友o既 Lunch Actually 經歷，同埋 tenacious同事o既故事之後，好多人問我故事o既主人翁是誰，仲不停地玩競猜遊戲。不過，我係唔會講既。雖然我知道當事人可能唔介意承認，但我o既宗旨係，「我有個朋友....」呢一part，朋友o既身分必須絕對保密，就算你知係邊個，都唔會係由我把口講出嚟。一來大家有好多想像空間 (估下估下都幾好玩丫)，二來係咪都爆人o地身分出來，仲有人會同我分享呢d o野咩？另一個我堅守o既原則，就係必須事先得到當事人同意，我先至會寫。我唯一可以比大家既 tips 就係，其實我有好多朋友，唔好估來估去都係果幾個啦 (haha)。

繼 Lunch Actually 之後，近排又識多一樣o野 - Coffee Matching。我有個朋友，最近就參加左 Coffee Matching o既 Speed Dating Coffee Break。


為左進一步認識呢間公司，我拜訪左佢o既網頁。似乎呢間公司冇Lunch Actually 咁structured咁有規模，而且主要以網上為平台，冇公司地址，只有聯絡電話。不過，個人認為佢 o地搞o既活動性質比 Lunch Actually 吸引好多，至少係多元化d。睇下佢o地o既活動：


Happy Hour for Busy Executives (女參加者的要求：pretty，幾咁現實，哈哈 )
Fall in Love with ~~Latte Art~~ (睇睇 vacant seats，明顯女參加者對呢樣野既興趣大好多，full左，男參加者就仲有好多位。又係喎，學下latte art幾好玩丫，就算冇收穫都至少學左d野嘛)
Speed Dating Dinner for Mature Members (女參加者要求：beautiful (同pretty有冇分別架呢？)，one on one dinner)
Speed Dating Coffee Break for Degree Holders (我個friend參加左呢個，轉頭再講)
Champagne & Chocolate Happy Hour (女參加者要求，又係beautiful，有冇d樣子普通都可以參加o既呢？)
Slow Dating Dinner for Professionals (only suitable for Certified Professionals, Senior Management or Entrepreneurs) 
Hot Summer Dating Party (YEE，呢個冇寫話要pretty或者beautiful!!!)
Fun Fresh Pasta Making & Group Matching (冇乜人參加喎)
Hourglass Romantic Dinner for Six (又係beautiful，有一顆美麗的心算唔算呢？)
Dinner for Six for Mature Executive/Degree Holders  (繼續beautiful。係唔係自己覺得自己beautiful就得架喇？)
Slow Dating Dinner for Tall Members - (wahahah 呢個我鐘意，但係女仔只需5"4，咁都叫 tall?!)


講番我朋友o既體驗。佢參加左某星期六下晝o既speed dating coffee break for degree holders，活動o係尖沙咀一間餐廳舉行(間餐廳ok ga，我平時都有去)。費用係200零蚊，有canapes 同unlimited drinks。參加者大概50人，男女各半，入場時大會已assign左一個枱號俾你坐低，另外仲會有張紙寫上你o既名。你鐘意可以寫埋你做邊行同埋你o既興趣。

坐定定之後，女參加者就唔需要郁，男參加者就會每5分鐘shift一次，等大家可以同唔同人傾計。話明得5分鐘，咁閣下就真係要把握時間去認識對方喇。大會會預先派張紙俾你，上面有晒咁多人既名。如果你同對方傾完之後，覺得大家可以交個朋友，就o係對方果格度剔一剔。活動完結時交番比大會。凡雙方有mutual tick既，大會會將對方o既email比你，等你地互相聯絡。

就朋友所見(以下內容乃朋友個人意見)，大部分男參加者都有正當職業，有做律師(不過好串)、公務員、sales，最多係做 engin 同 IT。Overall來講，女參加者o既平均質素高過男參加者，因為有d男參加者根本唔識同人溝通。

朋友憶述當日有一個樣子猥瑣的男參加者，一坐低，就用色迷迷既眼神加低沉既聲線同佢講：「你好靚女呀~~~」。朋友冇以心底話「我都知」回應 (:P)，反而即時比佢嚇窒左，唔駛講，OUT得。

另外有d參加者simply係dead-air，或者講完一大輪完全唔知佢講乜；有d話自己既興趣係做gym，仲有呢？都係做gym。

朋友話，參加呢d活動令佢更加清楚自己既定位，同埋知道自己要d咩。燕瘦環肥，唔靚仔，唔有型，其實某程度上都預左，而且反而唔係最重要。最終朋友都tick左幾個男參加者，都唔係咩靚仔有錢，而係整個人比人一種sincere、友善同埋溝通到既感覺。

你話呢d男人好難揾咩？又好似唔係丫，我身邊d朋友好多都係咁。不過，可能當你係果種男人既時候，你要既野就唔淨止係 beautiful咁簡單，又或者你根本連relationship都未想要。

(認真的環節要轉用認真的文字....)

朋友的單身生活很多姿多采，可是，她知道她終究還是想要找一個可以終老的伴侶。她不是沒有努力過，而且一直還真的都很努力。有時候，她也會覺得累，偶爾也會放不下女性的矜持，希望有人能主動去疼她。

上天安排每個人有他的路，有他的故事，不要羨慕別人(但要懂得欣賞和祝福)，不要嫌棄自己(樂天知命就好)。遇見過的，遇見到的，惜緣惜福。努力過後，一切就交給上天吧！

聽見　冬天　的離開　我在某年某月醒過來 
我想　我等　我期待　未來卻不能因此安排 

陰天　傍晚　車窗外　未來有一個人在等待 
向左　向右　向前看　愛要拐幾個彎才來 

我遇見誰　會有怎樣的對白 
我等的人　他在多遠的未來 
我聽見風　來自地鐵和人海 
我排著隊　拿著愛的號碼牌


我往前飛　飛過一片時間海 
我們也曾　在愛情裡受傷害 
我看著路　夢的入口有點窄 
我遇見你　是最美麗的意外 

總有一天　我的謎底會解開